Shillong, Jymmang, 09: U Assistant Inspector General (AIG) barim ka tnat Pulit ka Jylla u Bah GK Iangrai ha ka sngi Palei u la ujor da ka ejahar pyrshah ia u Director General of Police (DGP) ka Jylla u Lajja Ram Bishnoi da kaba kynnoh ba u la pyndonkam bakla bad pynjulor ia u Registration Number Plate jong ka kali.
Ha ka ejahar, u AIG barim u la ong ba ka Enquiry Committee ba la thung ha ka 18 tarik, Naitung, 2022, ha ka kaiphod kaba don ha ka Para 1 jong ka sla 3, ka kdew kumne harum: “kawei ka ka kali Hyndai Verna ba la set ha Central Workshop la pyndait da u nombar thok bad ym shym la rejistar ia ka kali da u AIG-A, namarba ym don satia ki kot ki sla.”
U la ong ba ka jingpynkhreh ia ka kaiphod ka paw ba la shu leh tangdep rukom, kata, ban shu ong khlem da leit jurip ha ka jaka bad ban bishar bniah ia ka rekod jong jong ka tnat Transport.
Katkum ka shithi hapoh ka Right to Information (RTI) kaba 27 tarik Naitung, 2023 halor katei ka kali, kata, ka Verna 1.6 VTVT la rejister bad ka tnat Transport, ka Sorkar Meghalaya, Shillong kum ka ML-02-A-0001, ha ka kyrteng jong u Director General of Police, ka Sorkar Meghalaya.
Ka jubab RTI ba la ai da ka tnat Tranport, ka Sorkar Meghalaya ka la lap ba ka kaiphod jong ka Inquiry Committee, ka kdew ba dei ban pynshitom ia ki dkhot jong ka Committee,” ong u Bah Iangrai.
Shuh shuh ha ka Ejahar, u AIG barim u kdew, “u Lajja Ram Bishnoi, uba bat ia ka shuki jong u Director General of Police, Meghalaya, u la wan sha Shillong, ban shimti ia ka kam ha ka 17 tarik, Jymmang, 2022 da kaba shong ha ka kali Kia Carnival Limousine Model rong lieh, kaba don ia u Rregistration jong ka Sorkar Assam, hynrei hadien kata, la iohi ba u Lajja Ram Bishnoi, ha ka jingiasuhbuit kam bymman, la pynkylla ia u number Plate jong ka kali bad mynta u la pyndait da ka number plate ba thymmai uba don ia u registration number ML-02-A-0001, uba dei u nombar ba la rejistar na ka bynta ka kali Verna 1.6 VTVT.”
U la ong la lap shuh shuh ba ka kali Kia Carnival Limousine ka dei ka kali kaba shu shim wai, na ka bynta ki kam, jong u Lajja Ram Bishnoi, hynrei u la pyndonkam ia kane ka kali na ka bynta kam shimet, kumba la sakhi na ki dur ba la pyndonkam bad ka jingdon jong u ha ka kali.
U AIG barim u la ong ba katkum ka Rules and Standard Guidelines, u Director General of Police ka Srokar Meghalaya, Shillong u dei hok ban pyndonkam tang ia ka kali kaba hapoh T. 12 lak, katba ka kali kaba la pyndonkam mynta ka shongdor haduh T. 40 lak, ia kaba u DGP, ka Sorkar Meghalaya um dei hok satia.
“Ki jingshisha baroh ba la kdew haneng ki long thik tang Offence of Criminal Conspiracy bad ka Criminal Breach of Trust bad ka jingshna thok, bad shukor ba la leh da u Lajja Ram Bishnoi. Namarkata, nga kyrpad ia phi ban register case pyrshah ia u nongleh kam bymman ba la kdew haneng hapoh ki kyndon jong ka aiñ bad ban pynngat kyndon mardor khnang ban pynthikna ba u dei ban ioh ia ka jingshah pynshitom,” la ong u AIG ha ka ejahar.
