Shillong, Jymmang, 09: Ka jingthmu jong ka Sorkar Jylla ban pynkynriah ïa ka Petrol Pump kaba don mynta ha Anjalee Point, da kaba ai bujli ia jaka ha ka thaiñ Upper Shillong ha ki bynta jong ka 5mer, Upper Shillong kaba dei ka jaka jong ka tnat Animal Husbandry & Veterinary and ka Sorkar Jylla, ka la pynlong ïa kiba bun ban ïeng pyrshah ia ka jingthmu.
Ha kaba ïadei bad kane, ka Federation Of Khasi Jaiñtia and Garo People (FKJGP) Upper Shillong Circle, ka Khasi Students Union (KSU) Upper Shillong Circle bad ka Synjuk ki Nongsynshar Shnong Upper Shillong Circle ha ka sngi Palei ki la shong jingïalang ban ïamir jingmut halor kane ka jingthmu jong ka Sorkar.
Ha ka jingiakren bad ki lad pathai khubor, u President ka FKJGP Upper Shillong Circle, samla Kitbok Nongphlang u la ong ba ka seng kam pyrshah ia ka jingai jaka ban pynriah ia ka petrol pump, hynrei ka jingpyrshah ka long ia ka jingai jaka, kaba la heh shaba palat kaba la kot haduh 13,500sq ft.
U la ong ruh ba ka jingai ka Sorkar da ka jaka kaba heh ka long kumba ka leh shiliang ha kaba ïa ki trai ri trai muluk la shu kyndang khlem da ai kano kano ka bailutksan katba ïa ki bar jylla la pynlong kum ki khun khatduh bad kynnoh ruh ba kane ka jingleh jong ka Sorkar ka don eiei sha lyndet.
