Shillong, Jylliew, 19: Ka Executive Committee ba la ialam da ka United Democratic Party ha Khasi Hills Autonomous District Council ka la khyllem jraiñ ha ka Lah Sngi u Blei hadien ba ka National People’s Party (NPP) ka la wanrah da ka No-confidence Motion ba la ai jingkyrshan lang da ki MDC jong ka Seng Congress.
U Chairman jong ka Council u Bah Lamphrang Blah uba la pdiang ia ka No Confidence Motion u la pynbna hapoh ka Ingdorbar ba ka Executive Committee ba la ialam da u Bah Titosstarwell Chyne ka la khyllem hadien ba ki 17 ngut ki MDC ki la kyrshan ia ka No-confidence motion pyrshah ia u.
Ia ka No Confidence Motion ba la wanrah da u MDC jong ka Rambrai Jyrngam Constituency u Bah Bajop Pyngrope la kyrshan da ki 11 ngut ki MDC jong ka NPP bad 6 ngut na ka Seng Congress.
U Chairman jong ka Council u la pynbna ba ia ka elekshon na ka bynta ka shuki Chief Executive Member yn sa pynlong ha ka sngi Baar.
U la pyntip ruh ba ka jingthep kyrteng kan long hapoh ka kamra treikam jong u Secretary ka Legislative bad ka jingbishar ia ki kyrteng kan long hi mynta ka sngi ka Lah Sngi U Blei.
Tang hapoh khyndiat kynta, u MDC jong ka Sohryngkham Constituency u Bah Pyniaid Sing Syiem u la thep kyrteng ban aireng na ka bynta ka shuki CEM.
Shwa kane, u Bah Titostarwell Chyne haba kren hapoh ka Ingdorbar u la kynnoh ba ka No Confidence Motion ba la wanrah pyrshah ia u ka dei ka jingshet kylla jong ka NPP ia ka UDP.
