Shillong, Jylliew, 19: Ka jingiai ther jong u lapbah lapsan ha ki bynta jong ka East Jaintia Hills ka la wanrah ia ka jingtwa khyndew kaba khlem sangeh hakhmat ka Tunnel kaba don ha surokbah National Highway-6 jong ka shnong Sonapyrdi kaba pyniasoh ia ka jylla Meghalaya bad ia kiwei pat ki jylla jong ka thain Shatei Lammihngi.
Da ki hajar tylli ki kali ki la sahkut da ki kynta ha kane ka jingtwa khyndew kat haduh ba ki la hap ban shu shong beit hajuh ban ap ia ki lad jingiarap na ki bor synshar District kiba la phah da ki kali puhshilum ban khat ia ka ktieh kaba la sahkut hapdeng surok.
Ha kane ka jingtwa jong ka khyndew kaba la sdang naduh ka 14 tarik haduh ka 19 tarik u jylliew, 2023, la sakhi ruh ba kawei ka trok ka la sahkut hapdeng ka ktieh kaba la tuid hapdeng surok ryngkat bad ki maw kiba heh.
