Shillong, Nailar, 22: U Myntri Khynnah uba khmih ïa ka tnad Jal Shakti ka Sorkar India u Dr Raj Bhushan Choudhary ha ka sngi Palei u la hiar sha South West Khasi Hills District ban jurip ïa ka jingpyntreikam bad ka jingseisoh jong ki skhim ka Sorkar Pdeng ha kane ka distrik.
Ïa u Dr. Choudhary la synran lang da u Myntri uba khmih ïa ka tnad Water Resource u Bah Comingone Ymbon.
Ki projek ba a bei tyngka da ka Sorkar Pdeng ki kynthup ïa ka Hydro meteorological Station hapoh ka National Hydrology Project ha ka wah Umngi, ka Phodumtyngkoh – Phodtangjem Minor Irrigation Project ha ka shnong Rangmaw, ka Miyawaki Project ha Pyndenspar, ka Amrit Sarovar Project Phase- II ha ka shnong Sakwang, bad ka MGNREGA project ha Phot Mawpon. U Myntri u la leit jngoh ruh ïa ka Flow Irrigation Project (FIP) ba la pyntreikam da ka tnad Water Resource ha Phot Umnew.
U Myntri u la peit ruh ïa ka jingpyntreikam ïa ki skhim bad u la ïakynduh ïa ki nongmihkhmat na ki tnad bapher bapher bad ka bor pynïaid distrik ha Circuit House, Mawkyrwat. Ki ophisar na ka Community & Rural Development (DRDA), Integrated Child Development Scheme (ICDS), Public Health Engineering, Prime Ministers Employment Generation Programme (PMEGP), Public Works Department (Rds), Water Resources, Soil and Water Conservation Department, Sarva Shiksha Abhiyan (SSA), Tnad ka Koit ka khiah, Tnad ka rep ka riang, Tnad Horticulture bad MePDCL ki la batai bniah shaphang ki jingseisoh bad ki jingeh ha ka jingpyntreikam ïa ki skhim ha kaba ïadei bad ki tnad jong ki.
Ha ka jingïakren bad ki lad pathai khubor, u Myntri u la ban jur halor ka jingpeit bniah ka Sorkar Pdeng bad ka jingphai khmat kyrpang ban kyntiew ïa ka thain Shatei Lammihngi ha ki bynta bapher bapher.
“Ka la don ka jingpeit bniah ba kyrpang da u Myntri Rangbah Duh, Narendra Modi na ka bynta ka jingkyntiew ïa ki jylla ka thain shatei lammihngi, bad kumta, ki Myntri ka Sorkar Pdeng ki wan sha kane ka thain man ka lai taiew ban pynthikna ka jingpynsted ïa ka jingpyntreikam ïa ki prokram jong ka Sorkar Pdeng na ka bynta ka roi ka par.”
“Mynta ka sngi, nga la peit ïa ka jingpyntreikam ïa ki skhim jong ki tnad bapher bapher ha ryngkat ki ophisar jong ka bor pynïaid ïa ka distrik. Ka jingpeit ka dei ïa ka roi ka par ha ka jylla ha ki bynta bapher bapher bad hangno ka Meghalaya ka don haba ïanujor bad kiwei kiwei ki jylla jong ka ri,” u la ong.
Hadien ka jingleit jngoh ïa kine ki projek, u Myntri u la leit ruh sha ka shnong Mawten bad Nonglang ban peit ïa ka jingpyntreikam ïa ka Greater Mawkyrwat Water Supply Scheme (GMWSS) bad ka Nonglang Water Supply Scheme (NWSS).
U la ïakren bad ki katto katne ngut ki briew kiba ïoh jingmyntoi na ki skhim jong ka Sorkar Pdeng kiba kynthup ka Jal Jeevan Mission bad u la hun ïa ka jingpyntreikam ïa kine ki skhim.
