Shillong, ïaïong, 01: Ka United Hynñiewtrep Movement (UHM) ka la pynrem jur ia ka jingkynthoh bad jingkynnoh ba khlem nongrim jong ka Coordination and Welfare Com-mittee (CWC) pyrshah ia ka KSU halor ka jingshah pyniap klep ki arngut ki bar jylla ha Ichamati ha ka janmiet jong ka 27 tarik, Lber, 2024.
Ha u kyrwoh ba la phah da u President ka UHM Bah Charlie J Rani, u la ong, “ka seng ka maham jur ia ka CWC ban shu padiah khlem nongrim ioh lyngba kane ka jingpadiah kulmar kane ka CWC kan poi pynban sha ka thma kaba heh.”
“Ka seng ka sngew ban buh jingkylli na ka Sorkar Jylla hato kito ki mynder kiba shim ia ka jingim jong u Bah Lurshai Hynñiewta (bam kwai ha dwar U Blei) ki lah shah pynsajia neem katkum ka aiñ nalor ba la tip thikna ba dei ma ki kiba leh ia ka kam bymman. Hato ka Sorkar ka la iohkem neem ia u Vicky Dey uba la byrngem ia ka KSU kumjuh ia ka jaitbynriew Hynñiewtrep ban pyniap klep ia ngi,” la ong une u nongialam ka UHM.
“U kyrwoh ba shai lyngba ka UHM sha ki bar jylla bad khamtam kane ka CWC ba wat pynbor ia ngi ki dkhot ka jaitbynriew Hynñiewtrep ba ngin shim ia ki sienjam ba tyngeh lyngba kane ka jingtei pop ia ka KSU bad kumjuh ia ki dkhot ka jaitbynriew jong ngi haba ka aiñ ka don ban bishar sngewbha wat padiah kulmar,” la maham u Bah Rani.
Haba maham ia ka Meghalaya Linguistic Minority Forum (MLMF) ka UHM ka la ong “ka Meghalaya Linguistic Minority Forum ka dei ban sangeh mardor halor ka jingthmu ban shong kyllaiñ myngor ha Khyndailad namar kane kan long pynban kumba theh umphniang ia ka ding ba dang klang mynta bad lada ka Sorkar kan ailad ia kum kine ki jingthmu jong ka MLMF kan sa poi sha ka jingiapher jaitbynriew bad kan sa mih ruh ka jingiapyni bor bad lada jia kano kano ka jingjia ba sngewsih lyngba kane ka Sorkar kan hap shim hi ia ka jingkit khlieh.”
Ka Seng ka pynrem jur ia ka Sorkar Kmie halor ka jingpyntreikam ia ka Citizenship Amendment Act (CAA) bad kumba ka jaitbynriew hi baroh kawei ka pyrshah kumta ka Seng ruh kan iai pyrshah ia kane ka aiñ iakjakor. Ka Seng ka dawa ba ka Sorkar Jylla ka dei ban shimkhia ia kane ka mat ban pynsngew ruh sha ki tyndong shkor jong ka Sorkar Kmie ba kam dei ban pyntreikam ia kane ka aiñ hapoh ka Jylla Meghalaya ba ha ka jaka jong kane ka dei ban pyntreikam noh mardor ia ka Inner Line Permit (ILP), ka jingpynrung ia ka ktien Khasi ha ka Khyrnit Baphra jong ka Riti Synshar ka Ri India bad ban pynthikna ia u pud u sam uba biang.
