Shillong, ïaïong 07: U MLA jong ka North Shillong Bah Adelbert Nongrum u la kam ba ka Advertisement ba la pynmih da ka tnat Pulit ka Jylla na ka bynta ban khot rungkam ka long kaba be-aiñ bad kam ruh ba ka dei kaba long markhongpong bad ka Office Memorandum kaba la pynmih ha ka 3 tarik, Rymphang, 2022.
Ha u kyrwoh ba la phah sha ki lad pathai khubor ha ka sngi Saitjaiñ u Bah Nongrum u la ong ba ka jingpynmih da ka tnat Pulit ïa ka Advertisement rungkam na ka bynta ki 2938 tylli ki post kaba la pynkynriah na ka 1 tarik sha ka 8 tarik Ïaiong, ka long kaba beain bad long markhongpong namarba ka Upper Age Limit na ka bynta ka post Constable ka long 21 snem bad 27 snem na ka bynta ka post Sub Inspector.
U la pynkynmaw ba ka Sorkar ka la pyndem ïa ka jingdawa jong u ban pynjlana ïa ka rta thungkam ïa ki trai jylla na ka 32 snem sha ka 37 snem mynba ka Meghalaya ka la rakhe ïa ka jingdap 50 snem ka jingïoh jylla bapura.
Halor kane, u Bah Adelbert u la ïathuh ba u la ïakynduh ruh ïa ka Secretary jong ka Central Recruitment Board ka Mary GT Sangma ban pan jingpynshai halor kano ka nongrim ba la pynmih ïa ka Advertisement kaba long markhongpong ïa ka Office Memorandum kaba la pynmih ha u snem 2022.
“Kane kam dei ka jingïohnong tang jong ka Constituency jong nga marwei hynrei na ka bynta ki khun samla jong ka jaidbynriew,” ula ong.
“Haba nga la kylli, ka (Secretary) la ong ba ka dei lyngba ka tnat Pulit. Kane ka pynpaw ba ka ïatakhuh bad ka Office Memorandum kaba la pynmih ha u snem 2022,” u la bynrap.
“Namar ka jingdon jong ka Model Code of Conduct, nga la shu ïakren ïa u Home Secretary lyngba ka telephone bad nga la buh ka jingkylli bad ka jubab ka long ba la leh ïa kane lyngba ka Revise Uniform Guide Line. Nga la ong kumno phi pynkheiñ ïa ka Rule bad ki Norms lyngba ka OM kaba 3.2.22 kaba kren shai ba la pynmih da ka tnat Personel. U Ophisar u ïathuh ba la pynkhreh bad ka kam ka dang ïaid shakhmat. Nga la ong, kumno pat phi pynmih ïa ka Advertisement haba phi dang pynkhreh. Kane ka long kaba be-aiñ bad kane ka paw ba ka Sorkar MDA kam dei na ka bynta ki samla hynrei ka dei kaba pyrshah ïa ki samla,” la ong shuh shuh u Bah Nongrum.
“Kane ka long ka jingpynduh noh ïa ka hok ban im bad ban pynduh ïa ka hok ki khun samla. Nga la ai jingmut khlem pynslem ba ki Ophisar ki dei ban pynmih mardor lyngba ka jingpynbeit (Corrigendum) ban pynbeit ïa kane ka jingbakla khnang ba ki khun samla kin ym duh ïa la ka jong ka hok,” la ïathuh u Bah Nongrum.
