Shillong, Nohprah, 17: Ki nonghikai skul Deficit kiba la shongthait na ka kam kiba don hapoh ka shatri jong ka Meghalaya Retired Deficit Teachers Association (MRDTA) ha ka sngi Saitjaiñ ki la dawa ïa ka Sorkar Meghalaya Democratic Alliance (MDA) ba la ïalam da ka National People’s Party (NPP) ban ai jingmynjur ha kaba bad ka jingsiew ïa ka baibam tymmen bad ban kyntiew ïa ka Death-Cum Retirement Gratuity (DCRG) na ka 3.5 lak sha ka 10 lak.
U President jong ka MRTDA Babu ED Nongsiang ha ka jingïakren bad ki lad pathai khubor hadien ba la wai ka jingïalang kaba la long ha Jail Road Boys Higher Secondary School, Shillong u la ong ïathuh ba ka Association kan sa pynlong ruh ïa ka jingïalang ha rilum Garo ha u Lber, 2024.
“Lada ka Sorkar ka dang ïai pynslem ban siew ïa ka baibam tymmen, hadien u Lber, 2024 ngin hap ban pynlong da ka jingïakhih,” la ong u Babu Nongsiang.
“Ngi la phah ïa kiba bun ki jingthoh bad ki dorkhas sha u Myntri ka tnat Pule Puthi bad sha u Myntri Rangbah ka Jylla bad ngi la ïakynduh ruh ïa u. Hynrei, ka Sorkar ka pynsuki bha bad kam shym la ai ïa ka baibam tymmen kaba ngi la dawa,” u la ong.
U la ïathuh ba ka Sorkar ka la bthah ïa ka tnat Pule Puthi ban shna ïa ka Draft Scheme of Pension for Meghalaya Non-Government Deficit School and Teachers Employees, 2023 hynrei ka Sorkar kam pat ai jingmynjur haduh mynta.
U la pyntip ruh ba ka jingdawa jong ka Association ka long ba ka Sorkar ka dei ban siew lem ïa ka baibam tymmen bad ïa ka DGRG sha ki nonghikai kiba la shongthait hashwa u snem 2017 bad hadien u snem 2022.
“Ka jingdawa jong ngi ïa ka Sorkar ban pynkiew ïa ka DGRG na ka 3.5 lak sha ka 10 lak ka long katkum ka jingai jimngmut jong ka Fifth Pay Commission,” la ïathuh u Bah Nongsiang.
“Ngi kyrpad ïa ka Sorkar lyngba u Director bad u Commissioner & Secretary ka tnat Pule Puthi ba kan leh kham kloi ïa kane ka jingdawa. Ngi ladep ban ïakynduh ruh ïa u Myntri Rangbah bad u la bthah ba ngin ïakynduh ïa ki Ophisar bad u la ai ka jingkular namarba ngi dei ki nonghikai kiba shah thung kum ka Sanction Post ha ki skul Deficit bad ngi dei hok ban ïoh ïa ka baibam tymmen,” la ïathuh u President ka MRDTA.
“Hynrei ka jingkular ka dang sahteng bad ki Ophisar kim pat lah ban leh eiei bad mynta ngi dang ap ïa ka jingmynjur,” u la bynrap.
“Phi la ïohi ba ki nonghikai kiba la shongthait ki la tymmen, kim don pisa bad (kiba sah ha rilum Garo) kim lah ban wan Shillong bad ma ngi ruh ngim lah ban leit sha ka rilum Garo, ngi im ïa ka jingim kaba sohsat, ngi im ïa ka jingim kaba jynjar. Mynshwa ngi im ïa ka jingim kaba donburom, hynrei mynta ngi im sohsat bad ngi kyntu ïa ka Sorkar ba kan shimkhia ïa ka jingdawa jong ngi ban ai ïa ka baibam tymmen khnang ba ngin dup lah ban im khlem da pynwit ïa ki khun ki kti bad ïa ka imlang ka sahlang,” la kyrpad u President ka MRDTA ïa ka Sorkar.
“Ngi hap ban shu khrong na ki khun bad na ka imlang ka sahlang ban pyntyllun ïa la ka jong ka jingim. Ngi kwah ba ka Sorkar kan shimkhia ïa kane ka jingdawa jong ngi, khnang ba ngin lah ban im ka jingim kaba bha ynda la ïoh ïa ka baibam tymmen,” u la bynrap.
Haba kylli, u Babu Nongsiang u la pyntip ba ki nonghikai skul Deficit kiba la shongthait naduh ka Lower Primary haduh ka Higher Secondary ki don kumba lai hajar ngut ha baroh kawei ka jylla.
