Shillong, Lber, 11: KaHynñiewtrep Youths Council (HYC)-CEC lyngba une u kyrwoh ka phah ia ka khubor kaba shai sha baroh ki Agent jong ka Sorkar India ne ka Sorkar Jylla ba ki dei ban sangeh shisyndon ia kino kino ki jingthmu jong ki ban pyrkhat ne mutdur hi ruh ba kin khlong lane tih ia u Uranium na ka Bri U Hynniewtrep.
“Kum ka Seng, ngi skhem ha ka nongrim bad ka jutang ba ngi lah khlei ba da leilei ruh em ngim shah ban khlong ia une u marpoh khyndew na kane ka Ri ka jong ngi. Kumba ngi ladep ban kren naduh ki sngi bad ki snem kiba ladep, haduh mynta ka kynti ruh ngi iaineh skhem ba ngi pyrshah jur ia kano kano ka jingpyrshang ban khyllie biang ia ka kitab tih Uranium napoh kane ka Ri ka jong ngi,” ong u President ka HYC Bah Roy Kupar Synrem ha u kyrwoh ba la phah sha ki lad pathai khubor ha ka Lah Sngi u Blei.
“Ngi kren ruh da kaba shai ba kum ka seng bad ki dkhot jong ka baroh, ngi long kiba la kloi ban iakhun da kaba kano kano ruh ka lynti ban pynthikna ba ka Sorkar India ne ka Sorkar Jylla kin ym dei ban iohlad ban pyrshang pynim biang ia kane ka mat namar kan bha ba ngin iakhun mynta ban ia kaba ieh ban iap bad duhjaid ka Jaidbynriew lyngba kane ka bij jong u Uranium,” ong u kyrwoh.“Ka Seng ka pynrem jur bad maham tyngeh ruh ia kato ka briew kaba kyrteng ka Elizabeth Nongbri bad ia kiwei ruh, ba kam dei ban pyrshang mushlia laplah ia kane ka kam iap kam im jong ka jaidbynriew. Lehse kane ka briew ka kwah ban sngewthuh (testing the waters) ia ka sur jong ki khun samla bad ki dkhot ka jaidbynriew bad hadien pat ka pyrshang ban len noh ia kaei kaba ka ladep ban thoh. To tip tang kawei ba kum ki sengbhalang ne ki kynhun bapher bapher, ngi lah ban don ia shibun ki jingiapher ha ki lama ba ngi don, hynrei ngi long kawei ka jingmut bad ka jingthmu bad “kata ka long ban iada bad pynneh pynsah bad khamtam eh ban ialeh khlem kynran dien na bynta la ka jaidbynriew,” la ong shuh shuh u kyrwoh.
