Shillong, Lber, 11: U President jong ka Hynñiewtrep National Youth Front (HNYF) Bah Sadon Blah u la ong ba lada ka jingtohkit ki Pulit ka lap ba u Bah Tarson um don bynta eiei ha ka jingpynbthei bom IED ha Them Iewmawlong kaba la jia ha ka miet sngi Saitjaiñ jong ka taiew baladep, ka seng kan ym sngap jar satia halor kane ka kam.
“Ka jingpyntyrha bad ka jingpynbitar kaba na ka por sha ka por namarba ym dei tang ia u Bah Tarson hynrei wat ka kali jong nga ruh ka la shah talasi arsien hapoh Bhoi khlem daw khlem nongrim,:” ong u Bah Sadon ha ka jingiakren bad ki lad pathai khubor hadien ka jingiakynduh ia u U Superintendent of Police jong ka East Khasi Hills u Rituraj Ravi ban pan jingpynshai halor kano ka nongrim ba ki Pulit ki la kem ia u Disciplinary Secretary jong ka HNYF-Central Body Bah Tarson Lymba.
Ha ka miet sngi u Blei, ki Pulit ki la kem ia u Bah Tarson Lymba, 58 snem na ka shnong Dawki bad ia u Bah Ebakordor Nongpluh, 26 snem na Shillong.
“Wat ki dkhot jong ngi na Nartiang bad na Lad Rymbai ruh ki shah phah wan mih sha Police Station. Ka long kaei kaei kaba ngim lah ban pdiang kum ka seng bad (ia mynta) ngin ap shwa kaei kaba lap ha ka jingtohkit (ki Pulit) halor ka case jong i Bah Tarson,” la ong u Bah Sadon.
