Shillong, Naiwieng, 6: Ka ophis u Deputy Commissioner, East Jaiñtia Hills District ha ka sngi Palei ka la pynshai ba ka jingdawa jong ka Meghalaya Commercial Truck Owners and Drivers Association (MCTODA) ban pyntreikam da kajuh ka dor kit mar shabar jong ka jylla ka long kaba beaiñ bad kaba long ruh shabar u pud ka jylli treikam jong ka Sorkar Jylla.
Ha u kyrwoh ba la phah sha ki lad pathai khubor ha ka sngi Palei u Deputy Commissioner jong ka East Jaiñtia Hills District u la ong, “hadien ka jingkhot ïakren, ka JHCMA ka la pynshai ba baroh ki karkhana pynmih dewbilat ki la pyntreikam ïa ka dor kit tang hapoh ka jylla katkum ka jingbthah da ka Sorkar.”
“Hynrei ka MCTODA ka la dawa ba ïa kajuh ka dor kit dei ban pyntreikam ruh haba kit mar shabar ka jylla. Ka long kaba donkam ban sngewthuh ba kam don kano kano ka kyndon kaba kdew hapoh ka Motor Vehicles Act, 1988 bad kano kano ka sorkar jylla kam lah satia ban pynnmih ïa ka jingpynbna na ka bynta ka dor kit mar shabar ka jylla. Ka dor kit mar ka dei kaba la pynshong nongrim katkum ka jinglong ka iew ka hat, ka jingjngai, ka jingïasngewthuh jingmut hapdeng ki kompeni bad ki nongkit nong. Namarkata, ka jingdawa ban pyntreikam da kajuh ka dor kit shabar ka jylla ka long kaba be-aiñ bad ka long ruh shabar u pud ka jylli treikam jong ka Sorkar Jylla,” la ong u DC.
U la ïathuh ruh hadien ka jingpynbna ïa ka jingïakhih naduh ka 27 tarik, Risaw, 2025, ki bor synshar district ki la khot ïakren ïa baroh ki kynhun. Ïa ka jingïalang la pynlong ha ka 30 tarik, Risaw, 2025 ha ophis u Deputy Commissioner,, Khliehriat, ha kaba la ïashim bynta lang da ki nongmihkhmat na ka Jaiñtia Hills Cement Manufacturers Association (JHCMA), ka Jaiñtia Hills Truck Owners Association (JHTOA) bad ka East Jaiñtia Hills Truck Owners and Transporters Association (EJHTOTA).
“Wat hadien ba la phah jingtip, ka MCTODA ka la kyntait ban ïashim bynta ha ka jingïalang. Ki ar tylli ki Associations-ka JHTOA bad ka EJHTOTA ki la pynthikna ba kin pyntyllun beit shakhmat ïa ka kam bad ki karkhana pynmih dewbilat bad ban ym ai jingkyrshan ïa ka jingïakhih. Ki la aiti ruh da ka jingthoh ban pynpaw ba kin pyntyllun beit shakhmat ïa ka jingkit mar,” la pyntip u DC.
U kyrwoh u la pyntip, hynrei ha ka jingïalang kaba la long ha 31 tarik, Risaw, 2025 bad ha ka 3 tarik, Naiwieng, 2025 hapdeng ka JHCMA bad ka MCTODA, ba la pynïaid da u Deputy Commissioner, ban ïakren halor ka jingdawa ba la pynsngew da ka MCTODA. Ka jingdawa ka long ban pyntreikam ïa ka dor kit ba la pynmih katkum ka jingpynbna, ban khanglad ïa ka jingkit palat pud, ban ai kitnong shwa ïa ki trok trai jylla, ban pynbiang ïa ka jaka ieng kali, ban siew biang por ïa ka bai kit mar bad ban pynbiang ruh ïa ki nongtrei.
“Wat hapdeng ka jingkular da ki karkhana dewbilat, ka MCTODA ka la kyntait ban weng ïa ka jingïakhih bad ka la bteng ban khanglada ïa ka jingïaid jong ki trok kiba kit dewbilat bad clinker ha shilynter ka surok National Highway-6 da kaba pynwit ïa ka jingkit mar bad ïa ka leit ka wan ki paidbah.
U DC u la ong ba ki bor synshar district kin ïai bteng ban ïakren bad baroh ki kynhun, ka MCTODA, JHTOA, EJHTOTA, bad JHCMAban poi sha jingïapynbeit khnang ban pynneh ïa ka shongsuk shongsaiñ bad ban pynthikna ïa ka jingïaid beit ka leit ka wan ki kali bad ban ïada ïa ka kam kamai jakpoh jong ki nongniah trok ha baroh kawei ka district.
