Shillong, Jymmang 30: U Vice President jong ka Hynñiewtrep Youth Council (HYC) Bah Donboklang Kharlyngdoh ha ka sngi Palei u la leit hajir hakhmat ki Pulit ka Sadar Police Station hadien ba ki Pulit ki la pynngat Case pyrshah ïa ki nongïalam jong ka HYC halor ka jingleit pynpra dang shen ïa ki iing jong ki briew kiba sah beaiñ ha Lum Survey.
Ïa u Bah Kharlyngdoh la synran lang da u President u Bah Roy Kupar Synrem bad katto katne ki dkhot jong ka seng.
Ha ka jingïakren bad ki lad pathai khubor hadien ba la mih na thanat hadien ar kynta duna eiei, u Bah Kharlyngdoh u la ong, “ka jingshah khot hajir jong ki dkhot ka seng ha ki Pulilt ka long kumba pynthymmai ïa ka laisen ieid jaidbynriew.
U la ong, “ka jingleit hajir jong u ka long ban ai ka jingïatreilang bad ki Pulit ha kaba ïadei bad ka jingjia ha ka 23 tarik mynta u bnai ha kaba ïadei bad ka jingpynpra ïa ki ing sah be-aiñ jong ki briew ha Lum Survey.”
Haba buh jingkylli ïa ka Sorkar Jylla halor ka jingshah khot hajir na ka jingleit pynpra ïa ki iing ba la sah beaiñ da ki poiwir u Bah Kharlyngdoh u la ong, “hato (ka long) beaiñ (ïa) u nongleit shna ing ha jaka jong ki briew ne (ka long) beaiñ (ïa) u nongleit pynkhuid ïa ki nongshna ing ha ka jaka ki briew? Hato ka long beaiñ ïa uba thmu ban pynkhuid bad ban rat dyngkhong ïa u drok ne long ka beaiñ ïa kito kiba thmu ban leit khot biang ïa ki briew na Assam kumba la kynnoh da ki nongdih drok kiba la shah kem ha ka seng ban wanrah biang ïa u drok ha Lum Survey.”
“Dang kham lah kaba shah khot be-aiñ ba ieid ïa ka ri bad ka jaidbynriew ban ïa ki nongbat aiñ kiba arsap ki ban kylla long ka jingtim ïa ka ri bad ka jaidbynriew ïa ka pateng ba mynta bad kaba lashai,” u la bynrap.
U President Bah Roy Kupar Synrem haba bynrap halor kane, u la ïathuh ba ka jinglap jong ka seng ïa ka jaka sah jong ki poiwir ha Lum Survey ka dei ka pdeng ban pynïaid iew ïa u drok ha nongbah Shillong.
U la ïathuh ruh ba kane ka mih hi na ka shyntur jong ki nongdih drok kiba ka seng ka la ïohbat ha ka jingkhynra ïa ki nongdih drok ha kine ki taiew ba la leit noh.
