Shillong, Jymmang, 30: Uwei u nongrep na ka shnong Mookalangi Lapangap,West Jaintia Hills District ia uba la tip kyrteng kum Bah Tellmi Talang uba la 31 snem rta la suba ba ula shah pynïap dusmon ha ki runar kiba ym lah satia ban tip katba u dang don ha ka jaka rep kaba don ha khappud jong ka jylla Assam bad ka jylla Meghalaya.
Ia ka met jong une u nongrep kaba la thiah lyngktar la lap ha ka step 30 tarik, Jymmang, 2024 ha ka jaka rep ha Khlieh Ladaw.
Katkum ka khubor ba la ioh lum na u waheh shnong jong ka shnong Lapangngap u Bah Bah Deimon Lyngdoh ula iathuh ba une u nongrep ha ka step 29 tarik Jymmang, 2024 ula leit sha lyngkha ha ka por kumba 5:00 baje bad hadien ka jingbym poi iing ki bahaiing ryngkat bad ka shnong ki la leit wad ia u sha jaka rep hynrei la lap pat ia ka met jong u ha ka step kaba bud.
Halor kane ka jingjia u waheh shnong ula pyntip sha ki Pulit jong ka Saitsama Outpost bad mar mar ki pulit ki la leit ban pynlong ia ka jingtohkit bad ban pynkit ia ka met sha Jowai Civil hospital Ialong ban leh ia ka Post Mortem.
Na ka liang jong ki bahaiing hasdem bad ka dorbar shnong ki la suba ba ia kane ka kam dusmon la leh da ki nongshun kiba nabar shnong bad katkum ka khubor la iathuh ba une u nongrep u don ki dak ki shin mong ha ki bynta ka shyllang khmat, na khlieh, na lyngkdong bad na shyntur.
