Shillong, Naitung, 14: ka Khasi Jaiñtia Church Leaders’ Forum (KJCLF) ha ka sngi thohdieng ka la ong ba ka jingpyntreikam ia ka Uniform Civil Code (UCC) kan lam sha ka jingshah rat dyngkhong jong ka dustur ai jait kmie jong ka jaidbynriew Khasi.
Ha u kyrwoh, u Secretary jong ka Forum u Rev. (Dr.) Edwin H. Kharkongor u la ong, baroh ki kynhun jaidbynriew bad ki niam tynrai ki don la ki jong ki jingmut jong ki ban pdiang bad ban leh ha kaba iadei bad ka shongkha shongman, ka pyllait san shyieng, ka jingioh bhah bad kiwei kiwei, katba katto katne ki jaidbynriew ki don la ki jong ki jingiapher.
“Namarkata, kam long kaba dei ban shu pyntreikam ia ka Uniform Civil Code ha baroh kawei ka ri,” la ong u Rev. Kharkongor.
“Ha ki jaidbynriew Khasi jong ka Meghalaya, kan long kaba ma shikatdei eh, namar ha ka jingaijait bad ka riti ka dustur lada pyntreikam ia ka Uniform Civil Code kan wanrah jinglyngngoh bad kan pyndam syndon ia ka jingai jait kmie hapdeng ki Khasi,” u la bynrap.
“Ia mynta, ban peit katkum ba ka 21st Law Commission of India dang shen ka la ong ba ka Uniform Civil Code (UCC) kam pat da donkam than lane kaba la kwah lang da baroh ha kum kane ka por,” u la ong, bad bynrap, ban pyniaid beit shakhmat ia ka jingpyntreikam ia ka UCC pyrshah ia ka mon jong ki paidbah ha ka ri, kan pynpaw ia ka jinglong amriang bad ka jingbym pyrkhat bha jong ka Sorkar kaba bat mynta ia u lakam synshar.
