Shillong, Naitung 15 : U Myntri Rangbah ka jylla u Conrad K.Sangma u la pynlong ka jingleit jurip ïa ka thaiñ Khatarshnong Laitkroh C&RD Block ban khmih halor ka jingseisoh jong ki kam pynroi. Kane ka jingleit jurip ka kdew ruh halor ka jingkut jingmut jong ka sorkar ban kyntiew ïa ka thaiñ bad ban pynkup bor ïa ki nongshong shnong ha ka liang ka roi ka par.
Kane ka jingleit jurip ka long ruh ban pynleit jingmut ha kaba ïadei bad ki jaka ba la pyntrei lyngba ka skhim Mahatma Gandhi National Rural Employment Guarantee Act (MGNREGA) hapoh Laitmawsiang bad Laitsohpliah.U CM u la ïamir jingmut ruh ba ki nongtrei Job Card, ki Self Help Groups (SHGs) kumjuh bad ki Village Organizations (VOs) kiba la ïa don ryngkat lang ha baroh kitei ki ar jaka, kiba la pynpaw ruh halor ka jingkut jingmut ban pynïaid shakhmat ïa ki jingtreikam na ka bynta ka roi ka par.
Ka jingïamir jingmut ka pynpaw ruh halor ka jingdonkam jong ka skhim MG?NREGA bad ka jingjop kaba ki la ïoh hapoh ki shnong ki thaw, kaba pynskhem ruh halor ka jingkut jingmut jong ka sorkar halor ka roi ka par bad ka bha ka miat jong ki paid nongshong shnong.
Na ka liang u CM u la pynpaw ruh halor ki sienjam jong ka sorkar Meghalaya na ka bynta ka shnong Laitryngew da kaba ong; “Ka jingphaikhmat ka jong ngi ka long ban pynkylla dur lyngba ka jingpyntrei ïa ki projek bad ïa ki sienjam ki ban kyntiew ïa ka jinglong jingman jong ki nongshong shnong. Kane ka kynthup halor ka jingbuh ïa ka jaka ïalehkai na ka bynta ki khynnah ne ka ‘children’s park’ bad ka jaka kilan met ne gym hapoh ka kper jong ka krem Cave park khnang ban pynshlur ïa ki nongshong shnong ha ka liang ka koit ka khiah.Nalor kata ngi la kut jingmut ruh ban aibor shuh shuh ïa ki kynhun seng hapoh ka shnong ne Village Organisations (VOs) da kaba pynïoh ha ki ïa ki kor ki bor bad kiwei pat ki jait tiar kiba lah ban pynmih ïa ki tiar ki tar pynsahnam bad ruh ban kyntiew ïa ka kam jngohkai pyrthei.Lah ban kdew ba ngi la ai ka jingmynjur na ka bynta ka jingshna ïa ki lieng, ki jaka pynïeng kali, ki paiñkhana, bad ki lynti ïaid kjat hapoh kane ka park.”
Nalor kata u la ong ruh; “Ka jingïoh mynsiem lyngba ka jingseisoh jong ka jaka jngohkai ha Umiam ne ka Umiam Viewpoint, ka thong ka jong ngi ka long ban kyntiew bad pynbha ha kaba ïadei bad ki dukan hapoh TynamMasi Viewpoint ka ban khring bad pynsngewtynnad ïa ki nongwan shangkai pyrthei.Nalor kata ngin kyntiew ruh ha kaba ïadei bad ki jingshna jingbuh sahnam bapher bapher ka ban kyntiew shibun ïa ka kam jngohkai pyrthei.”
Haba kren sha ki nongshong shnong bad ki dkhot jong ki Self-Help Groups hapoh Laitsohpliah, U Conrad K. Sangma u la ong bad ha kine ki 45 tylli ki snem naduh ba la ïoh ïala ka jong ka jylla, la lah ban kyntiew ïa ka jingdon jong ki SHG jong ki kynthei sha ka 5000 tylli ha kaba la lah ruh ban pynïoh ïa ka jingïarap pisa kaba kot sha ka 30-35 klur. Hynrei, ha kine ki 5 snem ba la dep ka sorkr MDA hapoh ka jingïalam jong ka National People’s Party la sakhi ïa ka jingkiew shakhmat lyngba ka jinglah ban thaw shuh shuh ïa kumba 45,000 tylli kiwei pat ki kynhun SHG ha ryngkat ka jingpynïoh ïa ka jingïarap pisa kaba kot sha ka 500 klur ban kyrshan ïa ki jingtreikam ki jong ki.
Nalor kata u la ong ruh na ka liang ka sorkar ka la shimkhia ruh ha kaba ïadei bad ka jingkyrpad jong ki nongshong shnong ban weng ïa ki jingeh kaba ïadei bad ka jingkyrduh um hapoh ka thaiñ, bad lyngba ka Sohra Water Supply scheme, la mang T.48 klur khnang ban lah ban pyntrei noh shen ïa ka projek pynïoh um.
Lyngba ka National Rural Livelihood Mission la lah ban thaw haduh 44,067 ki Self Help Groups (SHGs), kaba la aijingmyntoi ïa haduh kumba 427,195 tylli ki longïing. Nalor kata la kyntiew shuh shuh sha ka 4,607 tylli ki Village Organizations (VOs) bad haduh 39,571 ki SHG ki la ïoh pdiang ïa ka jingïarap pisa kaba kot baroh sha ka T. 171.56 klur. Ki VOs ruh ki la ïoh pdiang ïa ka jingïarap kaba kot sha ka T.192.34 klur.
