Shillong, Nailur, 26: “Ka jingtur thma jong ki Karbi ïa ki paidbah Pnar jong ka shnong Lapangap da ki jri siat sim bad ki khnam ki ryntieh ka pynpaw shai ïa ka jingkwah jong ki Karbi ban ïa umsnam,” ong ka Khun Hynñiewtrep National Awakening Movement (KHNAM) ha u kyrwoh ba la phah sha ki lad pathai khubor ha ka sngi baar lyngba u Working President u Bah Thomas Passah.
“Ha kine ki sngi ba ladep na ka liang jong ki Myntri Rangbah ka Meghalaya bad Assam ki la kyntu ïa ka shongsuk bad wat ki Deputy Commissionere bad Superintendent of Police na baroh arliang ki la kyrpad ïa ka jingshongsuk. Hynrei ka jingbym kohnguh jong ki Karbi ka lah ban pynbitar ïa u paid Khasi baroh hi,” ong u kyrwoh.
“Katkum ka jingtip ba la ïohlum da ka KHNAM, kiba bun ki Karbi kiba wan ban pynklumar bad thombor ïa ki Pnar jong ngi, ki bym dei kiba sah ha ki thaiñ khappud, hynrei kiba dei ki nongshongshnong jong ki shnong kiba don shajngai na ka khapppud bad kine ki Karbi kiba la wansah shipor ha khappud la ai jaka sah bad bsa bam da ki Karbi kiba sah ha khappud bad ka jingthmu jong kine ka dei hi ban hi pynmynsaw ïa ki paradoh parasnam jong ngi,” la kam ka KHNAM.
“Ka jingïoh lad jong ki paidbah Karbi ban leh donbor kumne ka dei namar ka jingtlot ki Pulit Meghalaya ha khappud. Kum ban shu pynkynmaw dang shen, ki Karbi ki la beh krad wat ïa ki Pulit da ki jri siatsim. Ki bor Pulit, ka kamram ka jong ki ka dei ban ïada ïa ki paidbah na ka jingmynsaw bad lada donkam dei ban pyndonkam da ka bor katkum ka aiñ,” la ong ka KHNAM ha u kyrwoh.
“U Myntri ka tnat Kam Pohiing dang ha ka Dorbar Synrai ba dang shu dep shen u la ong ba ki Pulit kin hap ban pyndonkam da ka bor lada ki ïohi ba ka don ka jingma ïa ki mynsiem briew bad ki tiar paidbah. Te haduh u khnam bad ka ryntieh ki la pyndonkam ki Karbi te kam pat dei seh ïa ki Pulit ban leh ïa kaba donkam ne ki aiñ Pulit ha sor bad ha khappud ki ïapher mo?” la buh jingkylli ka KHNAM.
“Lada ka Sorkar kam leh eiei halor kane ka jingjia bad lada ki paidbah kin hap ban tur hi sha Block-1 ban ïada ïa la ki hymmen ki para, ngi kyrmen ba ka Sorkar kam khanglad. Ngi kyntu ïa ka Meghalaya Karbi Association (MKA) ban ïatrreilang na ka bynta ka shongsuk bad ka jingshngaiñ ki paidbah ha Block-1,” la pynkut u kyrwoh.
