Shillong, Lber, 12: Ka tnat Kam Pohiing jong Sorkar India ka la shna ia ki Rul na ka bynta ka ain Citizenship Amendment Act, 2019 ia kaba la pynmih paidbah ha ka Lah Sngi u Blei mynta ka taiew.
Ha u kyrwoh ba la phah da ka tnat Kam Pohing ka Sorkar India, la pyntip ba ka jylla Meghalaya kan ym hap hapoh ki kyndon ain jong ka Citizenship Amendment Act, 2019 bad kyndon ain jong ka Citizenship Amendment Act, kin ym ktah ia ki jaidbynriew ritpaid riewlum kiba shong basah hapoh kane ka jylla Meghalaya.
Ka tnat Kam Pohing ka la ong ruh ba Citizenship Amendment Act, kan ym treikam hapoh ki jaka ba hap hapoh ka Khyrnit Bahynriew jong ka Riti Synshar ka Ri India hynrei ka kam ka dang iaid shakhmat ban pynkhlain shuh shuh ia ki lai tylli ki Autonomous District Council kiba don hapoh kane ka jylla Meghalaya.
Ka Citizenship Amendment Act, ka plie lad plie lynti ia ki katto katne ki jaidbynriew na ka niam Hindu, Sikh, Buddhist, Jain, Parsi bad ki Khristan kiba la wan na ka ri Bangladesh, Pakistan bad Afghanistan ban sah hapoh ka ri India ym palat ia ka 31 tarik u Nohprah, 2014 na ka daw ka jingshah banbein ha ka jingngeit niam jong ki, ki lah ban long ki nongshong shnong bapura jong ka Ri India, la pynshai ka MHA bad shuh shuh ka la ong ba yn ym shah ia kine ki phetwir ban shong ban sah ha ki jaka kiba dang hap hapoh ka Khyrnit Bahynriew.
Ka Citizenship Amendment Act, 2019 kan ym ai syrnod ia baroh kine ki nongbuhai shnong ban long nongshong shnong khlem ki jingpynshisha bad ki sakhi sabut bapura. Baroh ki nongpan jingbit kin hap ban iaid lyngba ki kyndon bapher bapher bad ka sorkar kan da bishar bniah ia kawei pa kawei ka jingpan jingbit.
Ka tnat Kam Pohing ka la pyntip ruh baka sorkar India ka la shimkhia ban iada ia ka hok bad ia ka jingbit jingbiang jong ki jaitbynriew ritpaid jong ka thain Shatei Lammihngi bad ban pynpoi ia ki song pynroi lyngba ka ‘Act East Policy’.
