Mawkyrwat, Lber, 11: Ar tylli ki dukan,kawei ka dukan sha ba la buh de bad kiwei pat ki marbam bad kawei pat ka dukan kaba die ia ki juti, slipar bad kopi, ki la kylla dpei hadien ba ki thylliej ding kiba klang bha ki la bamduh ia kine ki ar tylli ki dukan ha ka miet sngi Saitjaiñ ha ka por kumba 12 baje shiteng miet.
Kane ka la jia ha ka shnong Mawthong, kaba jngai 20 kilomitar eiei na Mawkyrwat, South West Khasi Hills District.
Kine ki ar tylli ki dukan ki dei ki jong ki shi kmie shi khun, kata, jong ka Kong Skola Wahlang bad u khun jong ka, u Bah Tanlin Wahlang. Baroh ar tylli ki dukan ki la kylla dpei bad la antad ba ka jingjulor ka la kot kumba T.2.50 lak.
U Bah Tanlin u la iathuh ba ha kane ka jingjia ym shym la don mano mano ba mynsaw namarba ym don ba sah hapoh kine ki ar tylli ki dukan bad da ka jingkloi jong ki paitbah ban ai jingiarap, la lah ban tem ia ka jingklang jong ka ding ban pur sha kawei pat ka ïing kaba don marjan.
