Shillong, Naiwieng 21: Ka Shillong Literary Festival, ka ba long naduh 20 tarik haduh 22 tarik Naiwieng 2025, ka la plie wang ïa ka khep ban rakhe jia ki jingtbit ha ka pyrkhat, ka thoh, ka thaw lade bad ha kaba ïa pur khana halor ki deiriti tynrai. Laisngi lynter ka rong ka taw ka tyrwa ïa ka kynthem jong riti tynrai ha ka thoh ka tar, naduh ka ba pynlait kot thymmai, kaba jurip ïa ki kot ba la dep pynmih, kaba ïatai bad ki riew tbit ha ka thoh ka tar bad ka pur khana marmet bad ki nongthoh. Ki nongthoh ba pawkhmat na jylla ki la ïoh lad ba syllok bad ki khlur thohkot jong ka Ri India ban ïa sam lem la ki jingtip bad jingtbit ha ka thoh ka tar.
Ha lyndet kita ki kam ki ba sani, ka rong ka taw ka la phuh la phieng ruh da kiwei kiwei ki lat kiba khring paidbah. Ki don ki basa die kot, ki ba kynshew ïa ki kot thymmai bad ki kot ba kynsai na kylleng, katba ki snap rikynti la pyninam ha la ki basa ba la mang khnang ban ïoh khmih kai ki paidbah ïa ki mar kordor jong ka thoh ka tar. Hynrei kaei kaba la khring kham kyrpang ka dei ka jingïathuh khana sawdong ka lyngwiar dpei kaba la pynwandur katkum ka juk hynrei la patneh ïa ka thymmei jong ki khanatang, haduh ba la pyrto ki paidbah ki ba shah shkor ban ïohsngew ïa ki khana tynrai jong ki paidbynriew ka jylla.
Kaba la pynkyndeh ïa ki paidbah dei ki sur phawar ha ryngkat ki ksing ki dhah ba la tem bad rwai da ka kynhun Khasi Cymru Music, kaba la byrshem ïa ki snap ka phawar bad ka khnatang ba la ïathuh. Ki dkhot jong kane ka kynhun ki dei ki riewtbit ba la pule ïa ka sur rwai surtem tynrai Khasi ha kaba ki la pyninam ha kylleng ka jylla bad ka Ri India, bad dang shen ki la wanphai na Ri Wales ban pyninam ïa la ki sap ki phong ha ka sur rwai surtem. Shi bnai lynter ki la dep pyninam ha Ri Wales ban shem ïa ka jingïadei hapdeng ki Khasi bad ki Welsh ha ka sanriti jong ki artylli ki Ri.
Ki dkhot jong kane ka kynhun sur rwai surtem ki long u samla Aijingkmen Janong, Balasiewdor Ryntathiang, Nangteidor Nongkhlaw, bad Risaka Nancy Pyrbot. La bynrap lang ruh da u Bah Banjop Leo Kharmalki, u tyngshop bad nongthoh ba shitrhem jong ka jylla u ba la shim bynta kum u tyngshop kongsan ha ka durim Apot kaba la shah jied dang shen ban pyninam ha ka tamasa durim 31st Kolkata International Film Festival.
Ka jingïathuh khana ba myllung la sot na ka kot ba la jer KOT- Khasi Old Testament, ba la thoh da u bah Raphael Warjri ka ba dei ka khanatang naduh ba thaw ïa ka pyrthei haduh byllai ki puriskam purinam kiba don ha ka imlang sahlang Khasi. Ki riewtbit ban ïathuh khana ba pynmyllung bad shem mynsiem ki long ka kong Fatima Nongbri bad Lucetta Syiem, kiba la ïathuh khana bad pynshai ruh hateng hateng khnang ba ki briew ba ym dei Khasi ki lah ban peiphang shaphang ka nongrim jong ki khanatang Khasi. Ki khanatang ba kongsan ki long ïa kaba thaw ïa ka pyrthei naduh ba mih nyngkong ka sngi, u bnai, ka lyer ka um ka ding kum ki bor tynrai ki ba la kyrsoi ïa baroh ki jynthaw ha pyrthei.
Ha ka sngi khatduh yn ai da ki khanatang shaphang ka ba thaw ïa ka pyrthei katkum ka riti dustur khanatang jong ki paidbynriew Garo. Ha kane ka jingïathuh khana yn sa pynsawang ruh da ki sur jong ki ksing ki dhah na ka kynhun Shillong Achik Cultural Artistes Association ka ban byrshem ïa ki sur tynrai Garo bad ki khanatang shaphang kaba thaw ïa ka pyrthei.
