Shillong, Nailur 06: Ka Khun Hynñiewtrep National Awakening Movement (KHNAM) ka la kynnoh ba ka Sorkar Jylla ka la pyndonkam bakla ia ka 171 Indian Penal Code (IPC) tang ban pynkbum ia ki Hynñiewtrep bad ong ruh ba ka jingkhot hajir ba dang shen ia u President ka Hynñiewtrep Integrated Territorial Organisation (HITO) u Bah Donbok Dkhar halor ka jingpyndonkam ia ka Uniform rong iong, ka dei ka jingleh donbor jong ka Sorkar.
“Hynrei ka HITO ka khlem phong ia ki jaiñ iong da ka jingthmu ban thok lane ialam bakla ia ki paidbah lane ia ka Sorkar bad katkum kaba ngi la iohi ha ki Social Media la ar snem mynta ngim tharai ba ka HITO ka phong ia ki jaiñ kiba iasyriem bad ki jain ba phong ki briew Sorkar haba ngi peit ia ki Batch lane kino kino ki dak jong ka sopti ka HITO ka phong. Namar kata ngi iohi ba ka Sorkar ka la pyndonkam bakla ia ka IPC 171 tang ban pynkbum ia kiba kren namar ki Hynñiewtrep bad ka dei ka jingleh donbor jong ka Sorkar,” ong u kyrwoh ba la phah da ka KHNAM lyngba u Vice President u Bah Thomas Passah.
“Ka sorkar kam pat lap lane shem lane khlem pat don kano kano ka jingujor ba ka HITO ka la leh ia ka kam be-aiñ namarkata ka jingpynngat ha ka IPC 34 ruh ka long kaba bakla,” la ong u kyrwoh.
“Haba ngi peit ia ki jain iong ba phong da ka HITO ngim iohi ba ki long kum ki Uniform Pulit namar khlem don ia ki Batch lane ki dak ki shin ha ka sopti kaba ia syriem bad ki Uniform Pulit namar kata ka jingshah pynngat jong ka HITO ha ka Section 105 jong ka Meghalaya Police Act 2010 ruh ka long kaba bakla,” ong shuh shuh u Kyrwoh.
Haba kynthoh halor ka jingjia ba dang shen, ka KHNAM ka la ong, “lada phai sha ka jingjia ha ka 4 tarik Nailur 23, ka long kaba sngewsih ba ki bor jong ka aiñ kim pyrkhat shuh ia ki paidbah kiba iaid lynti, kiba niah kali ki bym bna eiei ruh. Shano ka jingkitkhlieh jong ki bor Pulit kiba dei ban iada ia ki paidbah bad wanrah ia ka shongsuk shongsain. Katkum ki Video kaba la paw ka jingleh baheh, ka jingtim sih jong ki Pulit ha ka 4 tarik Nailur 2023 ym i kop ba ki dei ki briew jong ka aiñ bad la sngewdei ban ong ba dei ban pynngat ia kine ki Pulit ha ka kyndon IPC 171 namar ki shu phong ia ka Uniform Pulit hynrei ki treikam beaiñ ban pyntieng bad pynsmiej ia ki paidbah.”
“Naduh ka 7 tarik Rymphang 2011 la pynbna ia ka Meghalaya Police Act, 2010 bad ka Section 73 (2) Chapter XII, ka batai ba ka Sorkar Jylla hapoh lai bnai na ka jingtreikam jong kane ka aiñ ka dei ban shna ia ka “Police Accountability Commission” ka ban peit ia ki jingujor jong ki paidbah halor ka jingleh donbor jong ki Pulit. Ka jingkylli kaba mih ka long ba naduh u snem 2011 balei ka Sorkar Meghalaya ka khlem shym la thung lane pynbna ia kane ka Commission. Hato kane kam dei ka jingailad jong ka Sorkar lane kiba bat ia ka Sorkar hi ban leh katba mon? Lada peit katkum kane ka Meghalaya Police Act 2010 ka dei ka Sorkar kaba pynkheiñ kyndon da kaba khlem thung ia ka Police Accountability Commission katkum ka jingbthah jong ka Section 73(2) jong kane ka aiñ,” la kynthoh ka KHNAM.
“Ka hok ban pyrshah ban buh jingkylli paidbah bad ban pynbor ia ka Sorkar ban jubab ka dei ka Fundamental Political Rights jong ki paidbah kaba wan beit na ka Article 19 jong ka Riti Synshar ka Ri India bad kano kano ka sorkar kam lah ban shu pyndonkam da ki bor Pulit ban knieh noh ia kane ka hok,” ong u kyrwoh.
“Ka jingmlieh jong ki Pulit ban shu kawang Tear Gas lada dei ia ki nonghikai ne ia ki sengbhalang ka long kaba ngi hap ban pynrem bad ka pynpaw ia ka jingbymlah jong ki bor Pulit ban treikam ha ka lynti jong ka aiñ. Ka Secretariat ka dei ka jaka paidbah bad ka jingpynjari ia ka Section 144 CrPC ha kane ka thaiñ ka long ka jingleh donbor, lada ki Party kiba synshar ki tieng ioh wan ki paidbah ban hylla bad dawa ia la ka hok ha Secretariat kan bha ia ki ban ym iakhun elekshon hi ruh hynrei ai kin peit ia la ka jong ka iing ka sem,” kynthoh ka KHNAM.
