Shillong, ïaïong, 04: Ka Khasi Students Union kaba la rakhe ia ka Sngi Kyrsiew Ri (Khasi National Awakening Day) ha ka 4 tarik, Iaiong, ka la teh ia ki banner ba dawa ban pyllait na along ia ki arngut ki dkhot jong ka seng kiba la shah kem dang shen na ka shnong Sohra, ka jingpyrshah ia ka Citizenship Amendment Act (CAA) bad ka jingpyrshah ia ka jingtih Uranium na kane ka jylla bad ka jingdawa ia ka Inner Line Permit (ILP).
U General Secretary ka Khasi Students Union (KSU) samla Donald V. Thabah ha ka jingiakren bad ki lad pathai khubor u la ong ba ka Seng ka la thmu ban pynlong ia kane ka jingrakhe ha Khliehriat, East Jaiñtia Hills District hynrei namar ka jingbym shah jong ki bor synshar ka East Jaiñtia Hills namar ka jingtreikam jong Model Code of Conduct (MCC) na ka jingdon jong ka Elekshon Lok Sabha ka ban sa long ha ka 19 tarik mynta u bnai, kumta ka KSU kam shym la pynlong shuh ia ka jingrakhe ia kane ka sngi Kyrsiew ri ha ka shnong Khliehriat.
“Ki dkhot ka KSU ki la leit ban pan jingbit na u Deputy Commisisoner ka East Jaiñtia Hills ha kaba u la phah sha u Chief Electoral Officer. U CEO u la ong ba um don jingpyrshah eiei lada ki bor synshar district ki ai jingbit. Ki bor synshar district ki la shu pyntip tang da ka ktien ba kin ai jingbit hynrei ha kine ki khyndiat sngi ka la pyntip ba ym lah shuh ban ai jingbit da kaba aidaw ba ka don ka Model Code of Conduct (MCC).”
“Haba ki ai ia kata ka daw kam leilei bad na ka liang jong ngi, ngi wad ia kiwei ki lad ki lynti kumno ban pynsngew lyngba ka Social Media sha ki paidbah ia ka jingdonkam jong kane ka Sngi Kyrsiew Ri. Kane kam dei ka jingtheh um pja ia ngi hynrei ha ki snem ki ban wan, ngi sa bteng ia ki prokram kiba pher bapher kiba kham heh ha kane ka sngi kaba kyrpang. Ha kata ka por, ngin ong beit ba wat ai daw bad la shem snem kam don ka elekshon bad ngi, ngin iaid beit shakhmat bad ka prokram.”
Haba kylli, u la ong, “kane kam dei shuh kaba dang thymmai, haba don kano kano ka jingjia, naduh ki snem kiba mynshwa ngi la tip ka kynhun kaba shah pynlong sohpdung ka dei ka KSU, ki ban shah kem nyngkong kin dei beit ki dkhot ka KSU. Kano kano ka jingjia kaba don ka jingiatakhuh hapdeng ki mynder bad ki Khasi lane tengteng ngim tip ioh dei para mynder ruh ngi tip thikna ba ka kynhun kaba shah pynlong sohpdung ha ka Sorkar ka dei beit ka KSU.”
“Kam pher lada ki leh kumta hynrei ma ngi ruh ngi ieng ha ka nongrim bad hynnin ka sngi ngi la leit ban tud bad ki dkhot jong ngi ruh khamtam kito kiba shah khynra na ing ki la leit haba phi wan khynra na ing phim ioh, kem mynta. Hynrei ka jingkylli ka long, haba la leit ban aiti kumto hynnin hynrei balei kim kem. Kata ka dei ka jingkylli kaba da ki million sien ia ka tnat Pulit,” la kynthoh une u nongialam ka KSU bad bynrap, “phi leit khynra ia u Reebok Diengdoh na ing phim ioh, shiteng synnia phi leit khynra, hynrei ynda u la leit aiti mynsngi mynshai ban aiti hi phim kem. Hato ka jingthmu jong ki ym dei ban kem hynrei ban leh da kumwei ruh kata ka dei kawei kaba ma ngi, ngi hap ban puson.”
Hynrei watla katta ka seng ka la shim da ka rai ban pynlong noh da ka lympung ialehkai Maitshaprang Khasi League Basketball, kaba la long ha madan ialehkai Basketball ha Mawlai Nongpdeng.
Ha kaba iadei bad ka jingbym ioh ban pynlong ia kane ka jingrakhe mynta ka sngi, General Seceretary ka KSU u la ong ba ki bor sorkar kim dei ban ai daw ha u snem u ban sa wan.
