KI POLITISHIAN MYNTA BUN SA TANG KIBA SHU THIANG KA KTIEN
Shillong, ïaïong, 04: U General Secretary ka Khasi Students Union (KSU) samla Donald V. Thabah ha ka sngi Palei u la kynthah ia ki Politishian da kaba ong naduh ba ka Meghalaya ka la ioh ia la ka jong ka jylla, kam pat don wat tang kawei ruh ka ain kaba ka jylla ka la lah ban pynurlong hynrei ha kine ki sanphew snem lait noh tang ka aiñ Land Tranfers Act kaba la wanrah da u Martin N. Majaw.
Ha ka jingiakren bad ki lad pathai khubor, une u nongialam ka KSU u la ong, “naduh ba ngi dang ioh ia ka jylla, ki bun hi ki bym pat lah ban kren bad ki bym pat lah ban pynurlong hynrei lait noh sa tang u Bah Martin N. Majaw (bam kwai ha dwar u Blei) ba la lah ban wanrah ia ka Meghalaya Land Transfer Act, bad katto katne ngut ki riewsaiñ pyrthei. Hynrei ha kine ki por leilei, ngi iohi ba ki Politishian jong ngi ki thiang tang ka ktien. Lada ki kren ha ki rynsan paidbah, kin kren shaphang ka jingieid jaidbynriew hynrei ynda ki la jop, ynda ki la shong ha ki shuki, kaei kaba ki leh? Kata ka dei kaba ngi kum ki paidbah ngim dei shuh tang ban shu kylli, hynrei ngi la sngewthuh ba kum kine ki jait briew ki dei kiba long kumno. Ngim pat iohi ia kano kano ka kam kaba ki ai na ka bynta ka jaidbynriew jong ngi kan shong shngaiñ ne ba ki mynder ri kiba wan buhai shnong hapoh ka Bri u Hynniewtrep kin shah weng noh na kane ka jaka jong ngi.”
U la iathuh ruh ba ka jingdawa jong ka KSU ka la sdang naduh ka por ba u Bah Banshan Sing Nongbet u dang long u President ka seng namarba ka jingbun palat ki mynder dei ban lap.
“Ha ka Jylla Assam, mynshwa ka la don kawei ka aiñ Illegal Migrants Determination by Tribunal, 1983, hynrei ki ong ba kane ka ktah ia ka Citizenship Act, 1955, ka Foreigners Act, 1946 bad kiwei kiwei kaba long palat ia ka aiñ ka pynduh noh ia ka snap jong ka Illegal Migrants (Determination by Tribunal), Act, 1983. Lada ngi peit ia ka CAA ruh ka long palat ia ka aiñ bad kane ka ktah ia ka Foreigners Act, 1946. Haba ka All Assam Students Union ka pynlong ia ka jingiakhih ha Mangaldoi bad Darrang District da ka Anti-Foreigners Movement, ki la soi ha u snem 1985 ia ka Assam Accord kaba pdiang haduh mynta bad katkum ka Assam Accord u snem ot kyrteng (Cut-off Year) ka dei naduh ka 24 tarik, Lber, 1971 namarba dei hadien u snem 1971 ba da ki million ngut ki Bangladeshi bad ki Pakistani ki wan rung sha ka thaiñ Shatei Lammihngi. Lada u snem ot kyrteng u treikam, ka mut, ba bun hi ki mynder ri bad ki bar jylla kin shah buh ha ki Detention Camp bad kin duh noh ia ka hok long nongshong shnong jong ka ri India,” la ong u samla Thabah.
“Ka KSU ka dawa nyngkong ia u snem 1951 kum u snem ot kyrteng, hynrei ha ka por jong u Bah Paul Lyngdoh hadien ka jingiakren bad ki nongsynshar shnong bad ki nongsynshar Hima ha kato ka por, ki la pdiang noh ia u snem ot kyrteng ha u snem 1971. Haduh kine ki sngi, ka KSU ka ieng beit ha ka nongrim ba u snem ot kyrteng un dei beit ha ka 24 tarik, Lber, 1971,” u la ong bad bynrap, “lada ka Sorkar ka aidaw da kumne bad da kumtai ka dei ban pynpaw paidbah ia ka jingiapher ha ka jingbunbriew ha ka khanasamari jong u snem 1951, 1971 bad u 1981.”
“Lynga ka jingiapher ka jingroi ki bar jylla ha kane ka jylla, ngi lah ban sngewthuh shai ba ka jingwan rung kyrthep jong ki mynder ri ka jur bha. Lada ngi peit ia ka jingkharoi ki nongshong shnong ha ka khanasamari 2001 ruh ka kiew haduh 27%, kaba heh tam ha India bad kaba heh tam ban ia ka National Average. Ki riewshemphang ki ong ba kane ka dei ka bym lah ban long ba ki kynthei kin shu kha khun palat ban poi haduh 27%. Ka Sorkar lada ka nud ba kam don shisha ka jingktah ka dei ban pynpaw paidbah ia ka jingiapher ka jingkharoi ki nongshong shnong jong ki bar jylla jong ka khanasamari 1951, 1971 bad 1981,” la ong shuh shuh une u nongialam ka KSU.
