Shillong, Rymphang, 9: Ka Kynhun Myntri jong ka Sorkar Jylla ha ka sngi Thohdieng ka la ai jingmynjur ïa ka Meghalaya Engineering Public Works Department Service Rules, 2024.
Ha ka jingïakren bad ki lad pathai khubor u Myntri Rangbah ka Jylla u Conrad K Sangma u la ong ha ka jaka ban pynbeit thymmai ïa ka Meghalaya Engineering Public Works Department Service Rules, 1995 ka Sorkar ka la wanrah da ka Rule kaba thymmai.
“Namarkata, ngi la pyndam noh ïa ka Rule kaba rim bad ngi la wanrah da ka Rule ba thymmai. Haoid, ngi la bishar bniah ïa ka jingpynbeit thymmai ruh bad kumba nga ong ïa ka jingpynbeit thymmai ki don bun tylli bad kaba suk ka long beit ban shu wanrah da ka Rule kaba thymmai. Mynta ka sngi, ïa ka Meghalaya Engineering Public Works Department Service Rules, 2024 la mynjur da ka Kynhun Myntri,” u la ong.
U Myntri Rangbah u la ïathuh ruh ba ka Kynhun Myntri ka la mynjur ruh ïa ka Bill ne ka Aiñ-rew kaba ïadei bad ka Meghalaya Fiscal Responsibility and Budget Management Act, 2006 na ka bynta ban wanrah ha ka Dorbar Mang Tyngka jong ka Ingdorbar Thawaiñ ka ban sa long shen.
