Shillong, K’lyngkot, 05: U Nongaitkien jong ka Sorkar MDA Bah Paul Lyngdoh uba long ruh u Myntri ka Sorkar Jylla ha ka sngi Thohdieng u la kyrpad ïa ka seng kieng atiar Hynñiewtrep National Liberation Council (HNLC) ban ym weng noh na ka jingïakren ïasuk.
Ha ka jingïakren bad ki lad pathai khubor, u Bah Paul u la ong ba ka Sorkar ka la ïohi ïa u kyrwoh jong ka HNLC kaba pynpaw halor ka rai ban weng noh na ka jingïakren ïasuk tang ha ki lad pathai khubor katba ka Sorkar kam pat ïoh ktien eiei halor kane ka jingshim rai jong ka HNLC.
“Kaba nyngkong, nga kwah ban kyrpad ïa ka HNLC ban ym weng noh na ka jingïakren ïasuk namarba kiba bun ki bynta kiba ladep sdang ha ka jingïakren bad ngi kyrmen ba ka jingïakren kan dang bteng bad ngi kwah ban ïohi biang ïa ka jingleit phai sha ka miej jingïakren,” u la ong.
Haba kylli, u Bah Paul u la ong ba um lah ban kynthoh eiei halor kane namarba u Myntri Rangbah Conrad Kongkal Sangma bad u Symbud Myntri Rangbah uba peit ïa ka tnat Kam Pohing Bah Prestone Tynsong ki don shabar jong ka nongbah Shillong.
“Hynrei watla katta, ka Sorkar kan sa shimkhia halor kane bad kyrmen ba ka kam kan long noh kham kloi tang shu wan phai u Myntri Rangbah,” u la bynrap.
U la kular shuh shuh ba ïa kane ka kam yn sa buh hakhmat eh tang shu wan phai u Conrad bad u Bah Prestone sha ka jylla.
Ha kaba ïadei bad ka jingdawa jong ka HNLC ban ai ka jingmab ei, u Bah Paul Lyngdoh u la ong, “ haoid, ka lah ban long, watla katta ka shong pat ha ki jait kam namarba ïa ki mukotduma ladep ban rejistar, bad dei ban pyrkhat eiei halor kane.”
Halor ka case ba la rejistar da ka NIA pyrshah ïa ka Seng, u Bah Paul Lyngdoh u la ong, “kito ki dei ki kam kiba bniah hynrei ban shu kren kyllum haba phi la don ha ka jingïakren kam dei ban don kano kano ka kyndon bad ka jingmyntoi kaba long tang shiliang bad namarkata ka dei ban long kaba ïasngewthuh jingmut lang.”
“Lada shim katkum ka nongrim jong ka jingïasngewthuh ngin sa lah ban khmih bniah ïa ki bynta kiba kyllaiñ bad lada shu kren kyllum ka dei ban long kaba ai bad kaba shim,” u la ong.
