Shillong, K’lyngkot, 05: U Myntri ka Sorkar Jylla Bah Paul Lyngdoh uba long ruh u Nongaiktien jong ka Sorkar MDA u la ong ba ka aiñ ka dei ban ieng rasong.
Ïa kane u la pynpaw haba jubab ïa ka jingkylli halor ka jingpynlong ïa ka jingïakhih kaba 48 kynta da ka All Meghalaya Tourist Taxi Association pyrshah ïa ka aiñ thymmai bym pat pyntreikam kaba la tip kum ka Bharatiya Nyaya Sanhita (BNS) kaba la shna khnang da ka Sorkar India ban pynjur ïa ka jingpynshitom ïa ki nongñiah kali kiba tynrah ïa ki briew ha surok bad kiba phet krad.
“Kane ka dei ka kam kaba khia ym tang na ka bynta ka Jylla Meghalaya hynrei na ka bynta ka ri India baroh kawei namarba ngi la ïohi ïa ka jingkiew ki jingjia aksiden na ka daw ka jingñiah kali khlemakor bad ha kiba bun ki khep ki nongñiah kali ki shim sting namar ka jingsynjor ka aiñ jong ka ri. Namarkata, ka aiñ ka dei ban ieng rasong,” ong u Bah Paul ha ka jingïakren bad ki lad pathai khubor.
Haba kylli, u Myntri u la ong, “katba ki dang ïakren kumne, ka jingïakhih ruh ka la jia ha baroh kawei ka ri bad ka leit ka wan jong ki kali kiba kit ïa ki nongleit jingleit ka la ktah bha ha baroh kawei ka ri India bad kane ka kam shym la jia tang ha ka jylla Meghalaya kaba don kham sha kyndong.”
Ha ka sngi Thohdieng, ki nongñiah kali kiba don hapoh ka shatri jong ka All Meghalaya Tourist Taxi Association ki la sangeh ban kit ïa ki nongleit jingleit bad ki la bat lut ïa ki nongñiah kali ha baroh kawei ka sor bad khap sor kum ka jingïashim bynta lang bad ki nongñiah kali ha baroh kawei ka ri ban pyrshah ïa ka aiñ BNS.
Kane ka kynhun ka la rai ban pynkut noh ïa kane ka jingïakhih lashai ka sngi Saitjaiñ.
