Shillong, K’lyngkot, 05: U Myntri ka tnat Jngohkai Pyrthei jong ka Sorkar Jylla u Bah Paul Lyngdoh ha ka sngi Thohdieng u la plie paidbah ïa ka dur ba la dro pynitynnat bha da ki kti jong u samla Pascal Mario Kmenlang Pathaw, uba long uwei na ki nongdro dur ba pawnam bha ha kane ka jylla Meghalaya.
Ha kane ka jingdro ba lah ban ïohi shynna bha ha ka kynroh jong ka ophis treikam jong ka ophis Deputy Commissioner ka East Khasi Hills, la batai ïa ka jingmut jong ka jingdro ba la ai jingkyrshan da ka Asian Paints, ka Start Indian Foundation bad ka Sorkar Meghalaya.
Kane ka jingdro ka phalang sha ka jingriewspah jong ka jylla Meghalaya ha ki kam jngohkai pyrthei bad ki jingteinam u menbarim, kiba kynthup ïa ka jingkieng jri, kaba kdew ïa ka jingïadei hapdeng u briew bad ka meiram-ew, ka jingkhuid jingsuba jong ka shnong Mawlynnong bad ka shnong Nohwet bad ka jingdro ka pynpaw ruh ïa ka jingithiang jong ki kshaid, ki syntiew ki skud, ki sim ki doh, ki mrad ki mreng, ki mawbynna ka jingriewspah ha ka kolshor jong ka jaidbynriew Khasi, Jaiñtia bad Garo kiba long ki lai tylli ki jaidbynriew kiba shong basah ha kane ka jylla Meghalaya.
U Bah Paul haba kren ha kane ka sngi u la ong, kane ka jingdro ka pynpaw shynnah ïa ka jingmut “Root and Rhythm,” kaba batai ka jingriewspah ka jylla Meghalaya ha ka kolshor. Kane ka jingdro kam long tang ka jingpynitynnat ïa ka ophis Deputy Commissioner hynrei ka pynpaw ïa ka jingïalong kawei hapdeng ka lariti bad ka jingbatai ïa ka jingim ba mynta.
“Kaei kaba ngi la leh mynta ka long ka jingpynshlur ïa ki nongjngohkai pyrthei ym tang ba kin ïohi ïa ka jingithiang jong ki lum ki wah hynrei ban nang kyntiew shuh shuh ïa ka kam jngohkai pyrthei,” u la ong.
U la ong ruh ba ka Jylla Meghalaya ka don byllai ban tyrwa sha ka pyrthei, lada phi pyrkhat shaphang ki kshaid kiba don ïa ki khanatang, ki lum, wat ka suiñ bneng bad manla ka dur jong ka mariang ka don ïa ka pakit ki mynnor kaba riewspah. U la ong shuh shuh ba ha u snem 2023 ka jylla Meghalaya ka la pdiang ym duna 15 lak ngut ki nongjngohkai pyrthei kiba na kylleng ka pyrthei, kaba pynpaw ïa ka jingjop jong ka jylla jong ngi.
Katba ka jylla Meghalaya ka dang tyllun ban pynpaw ïa ka jingriewspah ha ka lariti, kum kine ki jingsdang ki long kiba donkam ban pynneh bad ban kyntiew ïa ki jingithiang ba la don naduh hyndai ha kane ka jylla.
Ha ka jingplie paidbah ïa kane ka jingdro,la sakhi lang da ka Deputy Commissioner ka Kong Rosetta Mary Kurbah, lem bad ki ophisar.
