Shillong, ïaïong, 19: U Pator barim jong ka Sumer Patorship kaba hap hapoh ka East Jaintia Hills District Bah Remington Pasleiñ u la kam kam ba u sakhi da la ki jong ki khmat ia ka jingthep vote tuh ha Pala Polling Station kaba hap hapoh ka Sutnga-Saipung Constituency ha ka elekshon Lok Sabha kaba long ha ka 19 tarik, Iaiong, 2024.
Haba pyntip ia kane ka jingjia sha u nonglum khubor jong ka Batesi TV lyngba ka telephone, u Bah Remington u la kam ruh ba wat haba la pyndait ia ka CCTV hapoh kane ka Polling Station hynrei ka jingthep vote tuh ka la iaid beit shakhmat naduh ka por 9 baje mynstep ba u la poi ha kane ka Polling Station ban thep ia ka vote.
Shuh shuh u la kam ruh wat haba u la iakren bad u Presiding Officer bad ia u Rangbah Shnong ban pynsangeh ia kane ka jingthep tuh ia ka vote jong kiwei hynrei kim shym la sngap satia bad kynnoh ruh ba u Rangbah Shnong u ong ba kam shym la mih kano kano ka jingkulmar.
“Nga la iakren bad ki ophisar namarba ki briew ki mih ki thep (vote), ki ong ba ngi thep ia ki bahaïing hasem, nga la ong lada kim wan te nai thep. Ngam dei ba nga bishni iano iano. Nga khlem ong ban thep iano iano. Tangba kawei nga kwah ba uwei u briew un thep tang kawei ka vote. Ki leh beit ia kane da kaba thied khlieh briew, ka long kaba sngewsih.
Nga kwah ban leh eiei nangne shakhmat,” u la ong.
Haba kylli, u la ong, “la thikna beit mano ba ai pisa phi la tip hi. Nga la ujor ha ki ophsiar ba don hangto, u Rangbah Shnong um sngap bad u ong ba ngi khlem iakulmar hangne ngam tieng. Nga la ong ba lada kulmar ne ym kulmar hynrei ban thep ia ka Vote jong u briew ne ka briew ym long. Nga ong ba dei ban pynduh ia kane ka jingthied khlieh briew bad ia kito kiba ieng lang ban ong ai ia kato ka slip jong phi ban pynthep ma ngi. Ki ia ai ki bapli. Nga lah ban pynshisha bad nga kloi ban mih wat ha ki lad pathai khubor. Nga kwah ban tem ia kine ki kam ba kam dei shuh ban jia nangne shakhmat.”
“Nga iohi da la ki jong ki khmat ba u briew u thep 6-7 vote marwei. Ki ophisar ba don hanngto kim sngewthuh eiei ruh,” u la ong bad bynrap ba lada ka jingdon jong ka CCTV kam pyni ia kaei kaba u la sakhi u la kob ba u kloi ban shah kem bad shah set along.
Halor kane, u Bah Remington u la iathuh ba u la ujor lyngba ka telephone sha u Deputy Commissioner (Election) uba dei ruh u District Election Officer jong ka East Jaiñtia Hills District u Abhilash Barwanwal halor kane ka jingjia khnang ban pynsangeh ia ka jingthep vote tuh ha kane ka Polling Station.
Haba pyrshang ban kylli na u Deputy Commissioner jong ka East Jaintia Hills u la pyntip lyngba ka SMS ba u la phah tohkit ha u Sector Officer ban ioh ia ka kaiphod kaba bniah.
