Shillong, ïaïong, 19: U President jong ka All India Trinamool Congress (AITC) ka Baghmara Block u Mejoline S. Marak u la ujor sha u Returning Officer jong ka Tura Lok Sabha Parliamentary Constituency halor ka jingpynsaphriang ia ka khubor lamler ba shu shna thok ha ka Letter Head jong u Dr. Mukul M. Sangma uba dei u MLA jong ka 41-Songsak (ST) Constituency uba mihkmat ia ka All India Trinamool Congress.
“Kine ki jingleh ki long tang ka jingthmu ban ialam bakla ia ki paidbah nongthep vote ha ka Lok Sabha Elections 2024, ka ban long ha ka 19 tarik, Iaiong, 2024. Nga la ioh jingtip ba la pynphriang ia kane ka khubor lamler ha ka kyrteng u Dr. Mukul M. Sangma ia kiba la pynphriang da u Mr. Aldo A. Sangma, u MDC (Nominated) jong ka National People’s Party bad kiwei kiwei,” la ong u Marak ha ka ujor.
Ha kajuh ka por, u President ka AITC Baghmara Block u la phah ruh ia kane kajuh ka ujor sha u Chief Electoral Officer (CEO) ka Jylla u Dr. BDR Tiwari.
