Shillong, Lber, 11: Arngut ki briew ki la shah kem ha ki Pulit jong ka East Khasi Hills District hadien ba ka la jia ka jingpynbthei ia u bom IED hajan ka Syndicate Bus Stand, ha Them Iewmawlong ha ka miet sngi saitjain jong ka taiew baladep ha ka por kumba 10:30 baje mynmiet.
Ha u kyrwoh ba la phah sha ki lad pathai khubor ha ka Lah Sngi u Blei, u Superintendent of Police jong ka East Khasi Hills District Rituraj Ravi u la iathuh ba ki Pulit kiba la pynlong ia ka jingtohkit kaba bniah ki la kem ia ki arngut ki briew ha ka miet sngi u Blei, kata, ia u Bah Ebakordor Nongpluh uba la 26 snem ka rta uba la shah kem na Shillong bad u Bah Tarson Lymba uba la 58 snem ka rta uba la shah kem na Dawki.
Ki Pulit ki la thong ruh da ka khusnam pisa kaba 1 lak tyngka ia kino kino ki briew kiba la ban ai ia ka jingtip kaba bniah halor ka jingpynthei ia u bom IED ha Them Iewmawlong bad pyntip ruh ba ia ka kyrteng jong ki nongai jingtip yn sa buhrieh noh.
