Shillong, Lber, 11: Ki Nongialam jong ka Hynñiewtrep National Youth Front (HNYF) Central Body ha ka Lah Sngi u Blei ki la leit ban iakynduh ia u Superintendent of Police jong ka East Khasi Hills u Rituraj Ravi ban pan jingpynshai halor kano ka daw ba ki Pulit ki la kem ia u Disciplinary Secretary ka seng u Bah Tarson Lymba.
Ia u Bah Lymba, ki Pulit ki la kem ha ka miet sngi u Blei na ka shnong Dawki, West Jaiñtia Hills District tang hapoh 24 kynta ba la jia ka jingbthei u bomb IED hajan ka Syndicate Bus Stand ha Them Iewmawlong ha ka miet sngi Saitjain.
U Superintendent of Police jong ka East Khasi Hills u Rituraj Ravi ha u kyrwoh ba la phah sha ki lad pathai khubor ha ka Lah Sngi u Blei, u la pyntip ba ki Pulit ki la kem ia u Bah Ebakordor Nongpluh, 26 snem ka rta na Shillong bad ia u Bah Tarson Lymba, 58 snem ka rta na Dawki halor ka jinglap ksai ba ki dei kiba donkti ban pynbthei ia u bom IED hajan ka Syndicate Bus Stand ha Them Iewmawlong ha ka miet sngi Saitjain.
Ha ka jingiakren bad ki lad pathai khubor hadien ka jingiakynduh ia u Superintendent of Police, u Bah Sadon Blah u la ong, “u SP u la ong ba ka don ka jinglap ksai jong ki Pulit ba u Bah Tarson Lymba u donkti halor ka bthei bom ha them Metor. Ia mynta, ki Pulit ki la tian bishar ia u ha Kashari bad mynta ki dang pan bor na ka Kashari ban ioh set ha along ki Pulit (na ka bynta ban tohkit bniah).”
Haba kylli, u Bah Sadon Blah u la ong, “u Bah Tarson u dei u dkhot uba la rim bha ha ka seng bad uba la heh ka rta bad nga la ong shai ia u SP ba u Tarson kum u Disciplinary Secretary ka seng un donkti ha kane ka kam ka long ba ngim lah ban pdiang. Ngim kwah ban tuklar ia ka jingtohkit jong ki Pulit hynrei ngi pynsngew ba ngim lah satia ban pdiang namarba u dei u rangbah uba jaijai bad uba la rangbah ka rta bad uba la iatrei lang bad nga mynta la 20 snem. Ba un (Bah Tarson) leh shongshit ia kano kano ka kam da kaba iaid ia ka lynti ka bym dei ngam lah pdiang bad ngam ju kham lap ia kata.”
“Katkum ka jingsngew jong ka seng, ba u dkhot ka CEC un donkti ha kane ka kam pynbthei bom ka long kaba ngim lah ban pdiang,” la ong shuh shuh u Bah Sadon.
Ka tnat Pulit jong ka East Khasi Hills District ha u kyrwoh ba la phah sha ki lad pathai khubor ha ka sngi u Blei ka la pynpaw ba ki dak ki shin na ka jingbthei u bom IED ha Them Iewmawlong ka iasyriem bha ia kaba la ju leh da ka seng kieng atiar HNLC hynrei ka bym shym la kam trai satia ia ka la bthei u bom IED ha them Iewmawlong ha kane ka kynti.
“Naduh ba la bthei ki bom (IED) kylleng kylleng, bad kane kaba jia ha them metor ban shu kynnoh than tang ia kato ka seng (HNLC) bad ia u nongialam seng ka long kaba bakla namarba kane ka ishu them metor ka ladei lypa u shiah uba thar ha ki pyllew jong baroh kiba i donkam ban pynkynriah noh (ia kiba sah ha Them Iewmawlong). Ka tnat Pulit ruh ka dei ban leh homework namarba ka jingbitar jong u paidbah halor ka jingbym lah ban eiei jong ka sorkar ia ka them metor ka dei kawei ka daw. Mano ba donkti ban pynbthei bom ka dei ka kamram jong ki Pulit ban bud bniah bha ym tang ban shu pynlong sohpdung bad ban shu kem suk ia ki nongialam sengbhalang la ka dei na kano kano ka sengbhalang ruh,” la bynrap u President ka HNYF.
U la ong ruh ba ka jingbitar jong kiba bun balang halor ka ishu them Metor ka long namarba ka Sorkar MDA ka la shu kut tang ha kaba thung ia ki High Level Committee hynrei ka kam kam poi shano shano ruh.
Shuh shuh u la iathuh ba u Bah Tarson Lymba u dei uba sah ha ka shnong Dawki bad hadien ba la sdang ka jingiakren iasuk hapdeng ka HNLC bad ka Sorkar, dei u Bah Tarson uba la ialam ia ki ophisar ka Sorkar bad ka tnat Pulit sha ka shnong kaba don hajan khappud bad ka ri Bangladesh ban leit shaw ia ki dkhot ka HNLC.
“Lada um don u Bah Tarson, ngin ym tip hi ruh ia kata ka shnong ba ngin leit shaw ia ki (nongialam HNLC) namarba ka dei ka shnong kaba don sha kyndong bha jong ka khappud. Naduh ka sngi nyngkong ba i (Bah Tarson) la iarap wat ha ki jingialang bad ki jingiakynduh ruh i don lang, balei yn len ia kata, i don lang beit. Ngi iakren ia khana lang beit bad kumba long ma nga ba nga donkti lang ha ka jingiakren iasuk, ma i ruh i don lang ryngkat bad ngim don bynta da kumwei pat,” la iathuh u Bah Sadon.
