Shillong, ïaïong, 23: Arngut ki briew ki la shah kem ha ka sngi Baar halor ka jingdonkti ha ka jingshah pynïap jong ki bar jylla ha Ichamati bad ha Mawlai Mawroh.
Katkum ka thymmei khubor ba la ïoh na ki Pulit, ïa uwei la kem na Mawlai bad uwei pat na Nongthymmai.
“Ïa uwei la ïohkem ha kaba ïadei bad ka jingjia shah pynïap briew ha Ichamati bad uwei pat la kem halor ka jingjia ha jingshah pynïap briew ha Mawlai Mawroh ,” ong u heh Pulit.
Ha ka 2 tarik mynta u bnai, arngut ki dkhot jong ka Khasi Students’ Union (KSU) ki la shah kem halor ka jingkynnoh ba ki donkti ha ka jingshah pynïap ba dang shen jong ki nongbylla bar ylla ha Ichamati, East Khasi Hills.
Kine ki arngut la ithuh kyrteng kum u Shambor Shati (26 snem) bad u Meshadap Sohpen kiba dei ki dkhot jong ka KSU South Khasi Hills District.
Ha ka 27 tarik, Lber, arngut ki briew ki la kynnoh ba ki la shah bom haduh ban da ïap ha ki runar ha Ichamati. Kine ki dei kiba la ithuh kyrteng kum u Isan Singh bad u Sujit Dutta. Kine ki arngut ki dei ki nongbylla ha jaka tih maw. Ïa ka met jong ki la lap na Ichamati bad na Dalda ha kajuh ka sngi.
Katkum ka ejahar ba la mudui da ki bahaing hasem jong kine ki arngut ki lanot, ka jingshah pynïap ka la jia ha ka por ba la don ka jingpyrshah ïa ka CAA ha Ichamati.
Ha ka 10 tarik mynta u bnai, sa uwei u nongbylla uba la tip kyrteng kum u Arjun Ray (52 snem ka rta) u la duhei ïa la ka jong ka jingim na ka jingmynsaw jur hadien ba ma u bad arngut kiwei pat ki nongbylla ki la shah thombor ha ki runar ha Mawlai Mawroh.
Ki Pulit ki la pyntip ba katto katne ngut ki runar bym pat lah ban tip ki la thombor ïa ki lai ngut ki nongbylla misteri bar jylla kiba trei bylla ha kawei ka ing ha Mawlai Mawroh.
 | ReplyForwardAdd reaction |
