Shillong, ïaïong, 23: Kawei ka kali Auto Rickshaw kaba don ïa u nombar ML10-C-8814 bad kawei ka kali Thar kaba don ïa u nombar ML05-AB-0028 ki la julor bad pra phrom hadien ka jingshah rat ha kawei ka ka trok kaba don ïa u nombar NL01-N-5423 ha ka shnong Sumer Umbang, Ribhoi District ha ka 15 tarik mynta u bnai ha ka por 3:45 baje ne 4:00 baje janmiet.
Katkum ka jingïathuh jong u Bah Dapbor Syiemiong uba ñiah ïa ka kali Thar u la ong ba ki don lai ngut ki briew kiba shong hapoh ka kali Auto Rickshaw ba kynthup ïa u Bah Gentleman Thangkhiew, u Bah Donboklang Sumer bad u Bah Skhemlang Kshiar uba la mynsaw bad uba dang don mynta hapdeng ka jingshah sumar ha Civil Hospital, Shillong.
Katba lai ngut kiba shong ha ka kali Thar ki long u Bah Dapbor Syiemiong uba ñiah ïa ka kali uba lait thaw na ka jingmynsaw bad arngut kiwei pat kiba la mynsaw ki dei kiba la tip kyrteng kujm ka Kong Saniti Dkhar bad ka Kong Karen Dkhar.
Ha ka jingshah rat ha kane ka trok, ka kali Thar ka la leit rung jluk ha kawei ka dukan kaba don hakhmat surok kaba khang khyrdep.
Ïa kane ka jingjia la sakhi ruh da kawei ka longkmie ba die dukan ka Kong Ridahun Dkhar.
“Ngi la ujor da ka ejahar ha Umïam Police Station,” ong u Bah Syiemiong bad ïathuh katba ki dang ieng ban thied jingthied, kynsan kynsan la wan kawei ka trok kaba tynrah ïa ka kali nadien haduh ba ka kali ka la rung shapoh kawei ka dukan.
“Donbok ba hapoh ka dukan ym don briew namarba ki khang dukan hynrei lada dei ba ki plie ki briew hapoh dukan ki la mynsaw bad donbok ba ïada u Blei ngi la shu mynsaw malu mala,” u la ong.
“Kaei kaba ngi shem na kane ka jingjia, ka long ka jingkhlem akor jong ki nongñiah trok. Ngi ïohsngew ruh na ki paralok parajor ba khamtam sha kine ki thain ba ki ñiah khlem akor bad kaei kaba ki leh ruh kim ju siew bailutksan bad shim jingkitkhieh ïa kiba shah tynrah kum ïa ki briew ne ïa ki kali. Ki long laitlain,” la ïathuh u Bah Syiemiong bad pyntip ba ki Pulit ki la shimkhia halor kane kam bad ban register case namarba kim (trai trok) treh ban siew ïa kiba mynsaw.
“Ha kato ka sngi donbok ba ka (trok) tynrah shwa ïa ka kali jong ngi bad lada tynrah nyngkong ïa ka Auto Rickshaw kan jin da la don ka jingkhlad briew bad ba u Blei u dang ïada kiba don hapoh ka kali Autorickshaw hynrei uwei u dang don ha Civil Hospital u la shitom jur bad uwei pat u la mih na Hospital,” ula ong shuh shuh.
“Nga kyntu ïa ki bor jong ka aiñ ban shim khia halor kane namarba ki trok ki long khlemakor shaba palat,” u la ong.
U la ïathuh ba katkum ka jingïoh jingtip ba ïa ka trok la shim wai da ka French Transport Company. “Ki (Manager jong ka French Transport Company) wan ban kren hynrei ka rukom kren ka long bym suidñiew. Kaei kaei kaba jia ka long ka bym itynnat,” la ïathuh shuh shuh u Bah Syiemiong.
U la ïathuh ba u Manager jong ka kompeni ha ka jingïakynduh hynnin ka Lah Sngi u Blei u la shu phah kam da ka Insurance hynrei um shym la ïakren eiei halor ka jingmynsaw jong kine ki hynriew ngut.
“U nongñiah u la buaid bad u don bad u handyman. U Handyman u phet beit naduh kato ka sngi bad u dang wan mynta ka sngi sha Police Station hynrei u nongñiah u la phet naduh kato ka sngi ba ladep jia bad ynda ngi la wan na civil hospital la ong ba la phah leh Medical Test ïa u bad ngi la kylli na ki Pulit ki ïathuh ba u nongñiah jong ka trok u la buaid,” la bynrap ka Kong Karen Dkhar.
