Shillong, Jylliew, 20: Ka Kong Martina Pohshna na ka shnong Kuliang, East Jaiñtia Hills District ha ka sngi Palei ka ujor da ka ejahar pyrshah ïa ki shipai BSF da kaba kynnoh ba ki thombor ia u kurim bad jrong kti ruh ia ka khun kynthei ha ka miet sngi Balang.
Ia ka ejahar la register case ha Umkiang Patrolling Post.
Kumba la paw ha ki video, la sakhi ba ki shipai BSF ki la thombor ki la kren bad byrthen ruh da ki ktien sih tien sang bad rah ruh da ki tiar pynmynsaw.
Ha ka ejahar ka Kong Martina ka la iathuh ba ha ka sngi Balang ha ka por 11.30 baje mynmiet lai ngut ki briew kiba khlem phong Uniform bad kiba la kam ialade ba ki dei ki shipai BSF ki la wan kynjat da ka bor ïa ka jingkhang bad pynpait ruh ïa ka jingkhang jong ïing bad nalor kata, ki sdang ban ktah kti ïa u kurim jong ka u Bah Shanroi Lyngkhoi, ki la patan ïa u shabar bad ki la bom la shoh haduh ba la kdiah ki shyieng krung.
“Ngi la pyrshang ban iada ïa u kurim hynrei ngim lah ban iakhun namar ki la thombor shaba palat bad hadien kane ki shipai ki phet noh na ïing jong nga,” la iathuh ka Kong Martina ha ka ejahar bad bynrap, “sa kumba ha ka por 12.30 baje mynstep ki la wan biang haduh khatsan ngut bad ki la thombor biang ïa u kurim jong nga. Ki la patrong bad jrong kti ruh ïa ka khun kynthei jong nga kaba dang 15 snem ka rta. Ma nga kum ka kmie nga la pyrshang ban iada ïa la ka jong ka khun hynrei ki la kynjat pynban ïa nga haduh ba nga la pang lut ka met ka phad bad ki la set ïa ka shyntur jong ka khun jong nga haduh ba la pang ka shyntur,” la iathuh ka Kong Pohshna.
“Hadien kane ki la pynap da ki suloi ïa ngi bad byrngem ruh ban siat da ki suloi. Ngi la kyrpad bad ong sngewbha wat siat ïa ngi, hadien kane ki la byrngem ïa ka khun jong nga ba kin sa peitkai lada ka wan sha Umkiang. Hadien kine kiei kiei ngan sa tip tikna ba ki dei shisha ki shipai BSF,” la bynrap shuh shuh ka Kong Pohshna.
Ka Kong Martina ka la kyntu ïa ki Pulit ban kem ïa ki shipai BSF kiba donkti ban thombor ia ka ing ka sem jong ka bad ban pynshitom katkum ki kyndon jong ka aiñ.
