Shillong, ïaïong, 10: Ar ngut ki briew ki la khlad noh hashen ha kawei ka jingjia ba sngewsih hadien ba kawei ka trok kit dohkha ka la kylla ha surok Shillong-Jowai ynda poi ha ka shnong Mawblei, Shillong. Kane ka la jia ha ka step sngi Balang katba kane ka trok ka dang wan na ka thaiñ Smit. U nongniah jong kane ka troko u lait im na ka jingjia ba sngewsih.
Katkum ka jingiathuh jong ki briew kiba la sakhi ia kane ka jingjia ki la pyntip ba ka jingkylla khongpong jong ka trok kaba don ia u number AP16 TS-9689 ka dei na ka daw ka jingphiel jong ka Break.
Khnang ban lait na kino kino ki jingjia ba sngewsih ia ki mynsiem briew, la iathuh ba une u nongniah jong ka trok u la pynkylla khongpong ia kane ka trok bad ki ar ngut kiba la khladnoh hashen ka dei ha ka por ba ki la kynthih shabar na ka kali bad ki shah ban kylla ha kane hi ka trok katba ia u draibar uba la lait im na kane ka jingjia la rah noh sha Civil Hospital, Shillong
Tang shu ioh jingtip halor kane ka jingjia, ka kynhun Search and Rescue Team (SRT) jong ka Fire and Emergency Service (F&ES) marmar ki la leit mar mar sha Mawblei bad iarap sei ia ka met iap jong kine ki ar ngut.
Tad haduh ba pynmih ia kane ka khubor ym lah ban ioh ia ka jingtip kaba tikna la kine kiba iap ki dei naei bad kumjuh ruh ia u nongniah jong ka trok.
