Shillong, ïaïong, 10: U MLA jong ka Voice of the People Party na North Shillong Constituency Bah Adelbert Nongrum ha ka sngi Balang u la kyntu ia ki paidbah nongkyrshan jong ka party ba kin long kiba jaijai bad kin ap ia ka por haduh ka 19 tarik mynta u bnai, kaba dei ka sngi thep vote, ban pynpaw ia ka jingpyrshah.
Kane ka jingkyntu jong une u nongialam ka VPP ka long hadien ba ki la mih ki jingshah shoh shah dat bad shah kem jong ki briew kiba pyrta ia ka shab jong ka VPP ha ki jingialang ialap elekshon jong ka National Peoples Party (NPP) kiba la jia ha kylleng ki rynsan ialap elekshon ha kine ki khyndiat sngi.
Halor ka jingjia ha ka shnong Jaiaw ha ka janmiet Lah Sngi u Blei mynta ka taiew, u Bah Adelbert ha ka jingiakren bad ki lad pathai khubor u la ong, “jait ba ka wan jia hapoh ka Constituency jong nga, nga te ngam ngeit ba kan don ka jingshisha halor kata ka jingkulmar, hynrei kane ka dei ka rukom jong ka politik bad ka jingialehkai ba jakhlia kaba kiwei ki ngeit. Ka VPP ka ngeit ha ka Clean Politics. Ngi la pynlut mynta la jan shi snem naduh ba la pynkha ia ka Voice of the People Party (VPP) ban pynshai bad ban pynsngewthuh kumno phin iashim bynta ha ka sainpyrthei bad kaei ka kamram jong phi kum ki nongthep vote.”
“Ha,oid, ngi la pynrung kyrteng lada dei ba ki don kyrteng hapoh ka party, ka Identity Card bad ngin ym lah ban ong da kumwei pat. Nga pynrem ia kane ka jingjia bad ngam tip mano ba donkti bad kum kine ki jingjia kim dei ban don na kano kano ka party ne na kano kano ka liang jong kawei ka party kam dei ban don ka jingpynthud ia kiwei pat ki party haba dang iaid ka jingialap elekshon,” u la ong.
“Ha ka politik ki (mih) beit ki jingjia bapher bapher bad kum u riewpaidbah ngim tip lada don neem ka jingshisha ba phin kynnoh ia ka VPP bad kiwei kiba kyrshan ia kiwei pat ki party ki lah ban leit pyrta kumjuh ha ki jingialang ba ngi pynlong na ka VPP (hynrei) ngin ym lah ban pynshisha ba ki dei ki briew jong kita ki party namarba ym don jingpynshisha namarba ma ki (NPP), ki ladep ban phah kem. Ai ba ka ain kan leh la ka jong ka kamram (bad) ngin sa tip ia ki jingshisha,” u la bynrap.
“Kum u nongmihkmat na ka VPP ngim ngeit ia kum kine hynrei ngi kyntu kynpham ia kiba ieid kiba thoiñ ba kane ka dei ka por elekshon ngin ym leh shongshit hynrei ngin long borabor kiba shitrhem bad ngin ri borabor ia ka akor ka burom bad lada ka dei shisha ba ki don bynta kita ki briew kiba kyrshan (ia ka VPP) hynrei kumba nga ong haduh mynta ngam pat lah ban pynshisha bad ka party kam pat lah ban pynshisha ba ki dei ne kim dei hynrei lada ki dei, nga ong tang katne katba ka jingialap elekshon ka dang iaid lehse ha ka jingdom ka jingbitar ia kita ki nongsynshar baroh shikatta ym lah ban tip. To long kiba jaijai ap ia ka por kaba kham khraw kaba phin pynpaw pyrshah ia kita kiba phi dei ban pyrshah ka dei ha ka 19 tarik (mynta u bnai),” la kyntu u MLA ka VPP ia ki nongkyrshan.
“Hynrei kine kiba kynnoh beit imim peitpeit ia ngi kum ka VPP nga ong ka dei ka dak jong ka jingkutlad kaba ki iohi ba ym i donlad shuh. Kiei kiei kin sa paw ia ki jingshisha baroh. Ngi don la ka jong ka hok katkum ka riti synshar paidbah ban pynpaw da kaba iam, da kaba rkhie bad da kaba hylla. Kum ha kane ka ri laitluid ngi dei ban pdiang ia kane. Hynrei lada ngi sngap ia ka jingkren beiñ bad ka jingkynthoh jong kiwei pat ha ka jingialap elekshon haduh ba ki la shu kren beit tang ia u Bah Ardent Basaiawmoit u President jong ka VPP katba ki klet noh ia la ka jong ka nongrim bad ki pynsawa jur ia ka politik bad ki pynjah noh pat ia ka sur jong ka polisi,” la kynthah u Bah Nongrum.
Haba kylli, u la ong, “ngin ym lah ban rung ha ka jingmut jingpyrkhat jong kiwei, hynrei ka jingmut jingpyrkhat ka dei ka jaka rieh kaba skhem tam jong ka jinglaitluid longbriew. Ki paidbah ki la dom ki la bitar bad ki la kthang na kawei ka Sorkar sha kawei ka Sorkar ngim iohi ia kiei kiei ki dak jingkyrmen khamtam ki khun samla bad lehse ka lah ban dei ka daw ba ki sngewthuh ba dei sa tang u Prah (VPP) ba lah ban wanrah ia ka jingkylla ha kane ka jylla jong ngi bad kaba pynlong ia ki ban pynpaw ia kane ka jingkmen, ka jingkyrmen ruh.”
