Shillong, ïaïong, 10: U Returning Officer jong ka Shillong Parliamentary Seat u SC Sadhu u la pan jingpynshai na ka Voice of the People Party halor ka jingujor ba la ioh pdiang ha ka sngi Baar halor ka jingpynthud jong ki nongkyrshan ka Voice of the People Party (VPP) ha ka Lah Sngi u Blei ia ka jingialang ialap elekshon jong ka National Peoples’ Party (NPP) ha Jaiaw, East Khasi Hills District.
Ha ka jingpang jingpynshai, u Returning Officer u la ong ruh ba katkum ka jingioh ujor, ki nongkyrshan ka VPP ki la pyrta slogan bad kane ka pynwit ia ka jingialang bad la hap ban pynsangeh shwa ka por.
U Returning Officer u la ong, da ka jingpynbna ia ka General Election sha ka Lok Sabha-2024 da ka Election Commission of India ha ka 16.03.2024, ka Model Code of Conduct (MCC) ka la treikam mardor naduh ka 16.03.2024.
Haba kdew ia ki kyndon jong ka Model Code of Conduct (MCC) u Returning Officer u la ong, “ki kyndon jong ka Model Code of Conduct (MCC) na ka bynta ki seng saiñpyrthei bad ki kyrtong ki kdew shai ba, “ki seng saiñpyrthei bad ki kyrtong ki dei ban pynthikna ba ki nongkyrshan jong ki kim dei satia ban pynwit ne ban pynthud ia ki jingialang bad proseshon ba la pynlong da kiwei kiwei ki party. Ki nongtrei ne ki nongkyrshan jong kawei ka seng saiñpyrthei kam lah ban thaw jingkulmar ha ki jingialang paidbah ba la pynlong da kawei pat ka seng saiñpyrthei da kaba buh jingkylli da ka ktien ne da ka jingthoh ne da kaba sam ia ki kot lyngkdop jong ki party ki jong ki. Ia ki proseshon ym dei ban pynlong da kawei ka party ha ka jaka ba don ka jingialang ba la pynlong da kawei pat ka party. Ki poster ba la pynmih da kawei ka party ym dei ban weng da ki nongtrei jong kiwei pat ki party.”
“Mynta, namarkata, da kaba ailad ia phi ba phin tip, la bthah ia phi ba phin jubab ha lane shwa ka 12 tarik, Iaiong, 2024 ba balei yn ym lah ban pynshitom ia phi hapoh ki kyndon jong ka Model Code of Conduct,” la ong u Returning Officer
Ha kajuh ka por, u Returning Officer u la pan jingpynshai ruh na ka VPP halor
ka jingpynkheiñ ia ka Model Code of Conduct katkum ka jingioh pdiang ia ka ujor halor ka jingpyndonkam ia ka Social Media ban shna ia ki khubor thok pyrshah ia ka kyrtong jong ka National Peoples Party (NPP) lyngba ka YouTube Video ba la thep ha ka 3 tarik, Iaiong, 2024.
U Returning Officer u la bthah ia ka VPP ban phah ia ka jubab ha ka 11 tarik mynta u bnai.
