Shillong, Jylliew, 25: Ka kynhun ki nongsam khaw reshon ha East Khasi Hills District ki la pynpaw ka jingpyrshah ia ka jingbthah jong ka Sorkar Jylla ba ki nongsam reshon ki hap ban buh ia ka tarajur thymmai ba la tip kum ka e-scale mashin ban pynbiang thik pa thik ia u khaw reshon haba sam sha ki paidbah.
Ha ka jingiakren bad ki lad pathai khubor u Bah Danny Langstieh uba dei u dkhot jong ka Fair Price Shop Dealer Association u la ong ba kum ki nongsam khaw reshon kim lah satia ban pdiang ia kane ka jingbthah jong ka sorkar namarba u khaw uba la sam sha ki nongbam khaw reshon u dei uba wan na shabar jong ka jylla bad na ka jaka ba la sei ia u khaw tad haduh ban da pynpoi ha Guwahati u khaw u la nang hap khyndiat pa khyndiat na ka byrni tad haduh ba da pynpoi sha ki dukan sam khaw reshon ha kane ka jylla.
U la ong ruh naei ki nongdie khaw reshon kin pynbiang haba u khaw naduh ka jaka ba la sei um biang bad ong ruh ba ki nongsam khaw reshon ki pdiang sngewbha ia ka jingtyrwa jong ka sorkar ban pyntreikam ia ka e-scale machine hynrei u khaw naduh ka jaka ba u wan u dei ban biang beit 50 kilo ha manla ka shi byrni bad um dei satia ban duna ia kata.
