Tura, K’lyngkot 20 : Kan dei ka janmiet jong ka jingkmen ka bym lah shu ban batai ia ka kynhun ialehkai baroh kawei jong ka Ri-Bhoi Distrcit hadien ba ki rang bad ki thei ialehkai phutbol ki jong ka, ki la lah ha kaban ioh ban rah ia ka nam lahduh ne khur syndon da ka takma ksiar ha ka jingialehkai jong kiba 18 snem ka rta kynthei bad shynrang.
Ha lyndet ka jinglah ban ioh rah ka kynhun napoh Ri-Bhoi District lah ban ong ba ka dei namar ka jingshim khia bad kitkhlieh lang da baroh katta naduh ki khynnah, ki kmie ki kpa, nangta sa ki skul ba ki khynnah ba ki leit ban pule, ki dkhot Ri Bhoi District Sports Association kaba juh trei borbah ban sain dur ne ban pynmih ia ki khynnah ialehkai kiba kynsai.
Ha ka jingiakhun ia ka phainal kiba la long hynnin ka janmiet jong ka sngi Thohdieng jong ka taiew ha P.A Sangma Stadium, Tura, na ka liang jong ki kynthei, ka Ri-Bhoi ka la lah ba kan pynliem noh ia ka East Khasi Hills lyngba ka tie breaker da 3-2, katba ia ka takma rnong ne kyrdan kaba lai na kane ka jingiakob ka leit sha ka kynhun ki thei ialehkai jong ka Eastern West Khasi Hills District hadien ba ki la lah ban pynliem noh lyngba ka tie breaker ia ka South West Khasi Hills District.
Haba phai pat sha ka jingiakhun jong ki samla shynrang, ka kynhun ialehkai jong ka Ri-Bhoi District ki la lah ban pynliem noh ia ka West Jaintia Hills District da 1-0 bad ia kane ka shi kol ba kordor tam ia ka Ri Bhoi la the pia ka da u Riskhem Syiem.Ka East Khasi Hills District mynta ka kynti ka la hun ba kan bat ia ka kyrdan kaba lai ne khur da ka takma rnong kaba la wan hadien ba ka la lah ba kan pynliem noh ia ka West Garo Hills da 3-1.
Ha kaba kut jong ka jingiakhun baroh u Freddy Jyrwa ka East Khasi Hills uba la ioh ban thep 4 kol, u la ioh ban rah ia ka nam Top Scorer, katba na ka liang u Kitboklang Buam ka West Jaintia u la ioh ban rah ia ka nam best goalkeeper, katba u Tiros Kyndait jong ka West Jaintia Hills u la ioh ban rah ia ka nam Best Player.
Haba phai sha ka liang ki kynthei, ka nam thei ap kol kaba kynsai ne best goalkeeper ka leit sha ka Nibari Maring jong ka Ri-Bhoi, kaba la mih paw na ka daw ka jinglah ka jong ka ba kan kyrda (save) ia ki artylli ki penalty ha ka por ba la shut ia ka tie breaker, katba ka Inrilaidor Khongthaw jong ka East Khasi Hills ka la ioh ba kan khur haduh artylli ki khusnam kaba kynthup ia ka nam top scorer hadien ba ka la lah ba kan thep haduh 15 tylli ki kol bad kumjuh ia ka nam player of the tournament.
