Shillong, Naitung, 13: Ki dkhot jong ka Khasi Students Union (KSU) Mawthardrashan Circle ha ka sngi Thohdieng ki la leit ban khynra ia ki nongtrei bar jylla kiba trei ha Petrol pump Nongshyllong bad ha ka shnong Mawphanlur.
Ha kane ka jingleit khynra, ki dkhot jong ka seng ki la lap ba ki don 5 ngut ki bar jylla kiba trei bylla ha ka Petrol pump ha Nongshyllong, Eastern West Khasi Hill bad 7 ngut ha ka shnong Mawphanlur, West Khasi Hill ki bym don ia ki kot ki sla kiba biang.
Ia ki nongbylla bar jylla ki bym don ia ka Work Permit bad ki kot ki sla kiba biang, ka seng ka la phah ba kin leit phai noh sha ka jaka ba ki wan.
U President ka seng u samla Jibarpaul Thabah u la iathuh ba ka seng kan dang iai buddien ban bteng ia ka jingkhynra ia ki nongbylla bar jylla kiba shu wan trei khlem da pynbiang ia ki kot ki sla hapoh ka Eastern West Khasi Hills bad ha West Khasi Hills District.
U la maham jur ruh ia ki Kontraktor kiba ju wanrah da ki nongtrei bar jylla, shwa ba kin wanrah nongtrei bar jylla ki dei ban da pynbiang shwa ia ki kot ki sla hynrei lym kumta ka seng lada ka lap biang nangne shakhmat kan leh da kaba tyngeh.
