Shillong, Nailar 23 : Ki bahaing hasem ryngkat bad ki nongialam jong ka Hynniewtrep National Youth Front, East Khasi Hills District Unit ba la lamkhmat da u President u Bah Bless Dkhar ha ka 23 tarik, Nailar, 2023 ki la leit buh syntiew ha u lum jingtep jong u Balajied Dkhar ha ka lyngkhuh kaba 23 snem ka jingkhladnoh jong u ha ka jingshah siat iap ha ki Pulit, ha ka 23 tarik, u bnai Nailar ha u snem 2000.
Na ka liang jong ki dkhot ka Hynniewtrep National Liberation Council kiba dang don mynta ha kane ka jylla na ka bynta ka jingiakren iasuk bad ka Sorkar ki la phah rah ia u syntiew uba don ruh ia ka shab jong ka seng lyngba ka Hynniewtrep National Youth Front.
U Kpa jong u Balajied Dkhar, u Bah E.S. Ajar u la pynkynmaw ia ki sngi kiba u khun jong u, u Balajied Dkhar u la shah siat iap ha ki Pulit bad iathuh ruh ba wat ka jingtohkit ka la lap ba ka dei ka Fake Encounter bad da ka mynsiem kaba sngewkhia u la ong ruh ba balei ki Pulit kiba don da ki phew ngut kim shu kem pynban la shu siat iap ia ki.
Kum ban shu pynkynmaw hangne, u Balajied Dkhar, kynthup ruh ki arngut ki nongialam jong ka KSU, kata, u Samla Dawanbiang Shullai uba dei u Asst. Finance Secretary jong ka KSU Central Body bad u Samla Rocky Shylla uba dei u Sport Secretary jong ka KSU Wahthapbru Unit ki la shah siat iap ha ki Pulit ka jylla Meghalaya ha ka 23 tarik, Nailar ha u snem 2000, ha ka shnong Nongshiliang, Shillong katba ki dang ia shongkai ha kawei ka ïng bad u Balajied Dkhar uba ju khot sien u Hepkhoit uba dei u dkhot jong ka HNLC. Ki Pulit ki la siat iap ia kine ki lai ngut da ka jingsuba ba ki dei ki dkhot jong ka kynhun lehnoh NSCN-IM.
