Shillong, Jymmang 01: Ka Defence State Office, Guwahati ka la kular ban sa phah ia ka kaiphod kaba bniah halor ka jingleh sorjamin ia ki poiwir kiba sah be-aiñ ha Lum Survey, Shillong hadien ba ki bor synshar jong ka East Khasi Hills District ki la rai ban leh eiei pyrshah ia ki kam sniew kiba mih na kane ka jaka sah be-aiñ ki poiwir.
Ia kane ka jingkular la khlei da ki nongmihkhmat jong Defence State Office ha ka jingialang kaba la khot da u Deputy Commissioner jong ka East Khasi Hills District u SC Sadhu ha ka sngi balang.
Ka jingkhot jingialang jong u DC ia ka Defence State Office ka long halor ka jingujor jong ka Hynniewtrep Youths Council (HYC) sha ka Sorkar halor ka jingdon jong ki poiwir kiba sah beain ha Lum Survey ha lyndet ka Them Iewmawlong.
Ha ka jingiakren bad ki lad pathai khubor, u Sadhu u la iathuh ba ki nongmihkhmat jong ka Defence State Office ha Guwahati ki la wan mihkhmat ha ka jingialang bad ki la iasam jingtip bad ia ki kam ba kin sa leh ha kaba iadei bad ka jaka ha Lum Survey.
“Ki (DSO) la kular ban sa iasam ia ki jingtip. Ngin sa bishar bniah khnang ba ki jingtip ba bniah kin iarap ia ngi ba ngin dup lah ban shim rai hadien,” la ong u Sadhu.
Ha kaba iadei bad ki mukotduma ba dang sah pongding hapoh ka Iingbishar u Sadhu u la pyntip, “ha kaba sdang ka la don ka jingialeh mukotduma halor kane ka jaka bad la pynksan (ia ka jinglong trai) jong ka Defence State Office.”
U la ong ynda ka Defence State Office ka la phah ia ka Eviction Notice, katto katne ki briew, kiba sah hangto, ki la leit sha Iingbishar bad ka Ingbishar ka la pynmih da ka hukum (Stay Order) ba ka jingkyndang (ia ki poiwir) ka dei ban long katkum ka ain.
U la iathuh ba jingbishar kaba dang shu dep long shen ka la long ha u bnai Nohprah, 2023 bad ka Ingbishar ka la buh sngi biang ha ka 27 tarik, Jymmang ban shong bishar halor kane ka kam.
Haba kylli, u DC, u la ong, “ia mynta, (ym shym la leh ia ka jingsorjamin) namarba kane ka kam ka la don hapoh ka Ingbishar bad ka Ingbishar ka la buh sngi ha ka 27 tarik Jymmang ban pynmih ia ka rai. Ka long kum ka jingkheiñ dewthala bad ngin ym pat leh ia ka jingsorjamin ia mynta. Hynrei kin (DSO) phah ia ka kaiphod kaba bniah namarba ki ladep leh ia ka jingsorjamin.”
Shuh shuh, u Sadhu u la iathuh ba ki bor synshar District kin sa shimkhia ban leh eiei pyrshah ia ki kam runar ruser kiba ju mih na Lum Survey. “Ngin sa iatreilang bad u SP jong ka East Khasi Hills na ka bynta ban ioh ia kaiphod halor ka shongsuk shongsaiñ ha kane ka jaka khnang ba ngin dup lah ban leh eiei ia kino kino kiba pynkhein ia ki kyndon ain bad ka shongsuk shongsaiñ,” ong u Sadhu.
U la iathuh ba ha kane ka jingialang la thaw ruh ia ka Joint Committee ba kynthup na ka ophis u DC, ka Defence State Office, ka tnat Pulit bad ka Municipal Board. U la iathuh ba la phah tohkit hapoh shitaiew ha ki bor Pulit khnang ban pynshisha ia ki jingsniew kiba mih na ka jaka sah ki poiwir
Halor ka jingkynnoh ba ka jaka sah ki poiwir ha Lum Survey ka dei ka ktem die drok, u DC u la iathuh ba u dang ap ia ka kaiphod na ki Pulit bad hadien ba ladep ban pynshisha yn sa shim ia ki lad ki lynti ban pynduhjait ia ki kam sniew.
