Shillong, Jymmang 01: Ki Pulit ka East Jaiñtia Hils District kiba la pynlong ia ka jingtalasi ia ki kali ha Ratacherra Infil Check Post, East Jaintia Hills District ha ka sngi baar, ha ka por kumba 10:00 baje mynmie, kawei ka Bos Night Super jong ka MTC kaba don ia u nombar ML-03-0216 ka la shah pynsangeh bad shah talasi.
U Superintendent of Police jong ka East Jaintia Hills District, u Giri Prasad M. ha u kyrwoh ba la phah sha ki lad pathai khubor u iathuh ha ka jingtalasi, ki Pulit ki la ioh kurup ia u drok bad ia ki dawai kuli na uwei u briew uba la tip kyrteng kum u Mizazur Rahman Barbhuiya uba sah ha Kachudaram, Part-II, Silchar, Cachar District, Assam.
Na ka met jong u Barbhuiya, ki Pulit ki la ioh kurup ia u drok ba la thep ha ki 25 tylli ki synduk thep sabon uba shongdor 2.1 klur, 3720 tylli ki dawai kuli Nitrazepam Tablets bad kawei ka Mobile Phone.
Ki Pulit ki la register case hapoh ka NDPS Act bad la kem noh ia une uba donkti bad ka jingtohkit mynta ka la iaid shakhmat.
“Da ka jingkyrshan jong u Myntri Rangbah ka Jylla Meghalaya bad u Director General of Police, Meghalaya, kane ka dei ka jingiohkem drok kaba heh duh ha ka sien kaba ar hapoh lai sngi,” la ong u Prasad.
