Shillong, Nailur 19: U MDC ka BJP na Tura u Bernard N Marak u la ong ba ka jingïakhih jong ki nongtrei ka GHADC ka la long kaba jop. Ïa kane u Marak u la ong ba ka Executive Committee jong ka GHADC ha kaba khatduh ka la mynjur ban siew ïa ka tulop jong ki nongtrei ka Council ka ban long katkum ka jingmynjur hapoh ka 5th Pay Commission.
U la ong ba ka Council ka dei ban pyrkhat ïa ka jingshisha ba ka jingpynbna ladep ban pynmih da kiba bun ki Executive Committee jong ka NPP bad kumjuh ruh kane ka Executive Committee kaba mynta.
“Nga ai khublei ïa u Chief Executive Member (CEM) bad ia ki Executive Member kiba la shim ïa kane ka sienjam. Ka dei ka kamram jong ki dkhot kiba la shah jied ban peit ïa ka bha ka miat jong ka Council bad ki nongtrei da ka jingpyntreikam ïa ka 5th Pay Commission kan long ka kam kaba eh na ka bynta ka GHADC hynrei da ka jingïatreilang yn lah ban weng ïa ki jingeh,” la ong u Marak.
“Namarkata tang ka NPP marwei kan ym lah ban mad ïa ki jingeh ka GHADC, hynrei lyngba ka jingsynshar ka BJP ha ka Sorkar Pdeng bad kumjuh ruh da ka jingmynjur ïa ka jingïasoi soskular da ka ANVC ka la nang pynkhlaiñ ïa ki ADC ha ka jylla,” u la ong.
