Shillong, Jymmang, 06: Ka Hynñiewtrep Youth Cuncil (HYC) ha ka Lah Sngi u Blei ka la ioh bat kumba 15 haduh 20 ngut eiei ki nongdih drok na ka thain Polo ter ter shaduh Demseiñïong katba ki dang iadih pynleiñ pynleiñ ia u drok ha ki jaka paidbah.
Napdeng kine ki 20 ngut ki nongdih drok, mar shiteng ki dei ki bar jylla bad bad kiwei ki dei ki jaidbynriew na kane ka jylla.
Ha ka jingiakren bad ki lad pathai khubor, u President ka HYC Bah Roykupar Synrem u la ong hadien ba ka seng ka la ioh ia ka jingujor ba ki don ki nongdih drok kiba ju mlien ban dih paidbah ia u drok, ka seng marmar ka la leit ban bat bad ai jingsneng ia ki da kaba phah bat skhor.
U la ong ba ka jingbat jong ka seng ia ki nongdie drok ka long ban ai jingsneng ba kim dei shuh ban dih drok ha ki jaka paidbah.
U la ong ba ka seng kan sa leit sha kiwei ki jaka hapoh ka Sor Shillong ban pyntikna ba kim dei ban dih ha ki jaka paidbah.
Ha kajuh ka por, u la kyntu ia ki kmie ki kpa, ia ka Sorkar bad ki Dorbar Shnong ba ki dei ban shim ia ki sienjam ban tehlakam ia kane ka jingjyllei jong ki nongdih bad ki nongdie drok ha ka jylla.
“Ka Sorkar ba ka dei ban buh ia ki Rehabilitation Centre kaba lah ban iarap ia ki briew kiba duna ka kamai kajih khnang ba kin lah ban lait na kane kine ki jingdih kiba sniew,” la kyntu u nongialam ka HYC ia ka Sorkar.
