Mawkyrwat, Jymmang, 05: Lai ngut ki briew ba la suba jur ba ki dei kiba donkti ban pyniap dusmon ia uwei u rangbah uba la tip kyrteng kum u Pynskhemlang Lyngkhoi (27 snem) na ka shong Nongbah Marshillong, kaba jngai tang kumba 3 kilomitar eiei na Mawkyrwat, South West Khasi Hills District ki la shah kem ha ki Pulit.
Lai ngut ki briew kiba la shah kem ki long u Paul Andrew Lakiang na ka shnong Mawkyrwat, u Michael Wanniang na shnong Marshillong bad u Ricky Paul Snaitang na shnong Nonglang, kiba hap hapoh ka South West Khasi Hills District.
Kum ban shu pyntip, ha ka 2 tarik, Iaiong, 2024 ki paitbah nongshong shnong ki la lap ia ka metiap jong u Bah Pynskhemlang Lyngkhoi kaba don ia ki dak mong na ki bynta jong u ryndang, ka kti kamon bad kiwei de ki bynta jong ka met, na kawei ka jaka hajan ka pynthor kba ha Riatthawlong, kaba hap hapoh ka shnong Mawkyrwat bad kaba dei ruh ka lynti iaid kjat ban leit sha shnong Marshillong.
Ki Pulit la pynlong ia ka jingtohkit kaba bniah bad haduh mynta ki la ioh kem lai ngut ki briew kiba donkti ha kane ka kam pyniap briew bad ka jingtohkit ka la dang iaid shaphrang.
Ki Pulit ki la nang buddien shuh shuh ia kane ka jingjia ban iohkem lut ia baroh kiba donkti.
