Shillong, Jymmang, 30: Ki ophisar ka ophis Customs (Preventive) Headquarter, Shillong kiba la hiar sha ka shnong Biswanath Chariali, Assam ha ka sngi Balang mynta ka taiew ki la ioh ban kurup saw tylli ki bniat Hati kiba khia 27.992 kilo bad kine ki bniat ki dei jong ki Hati na ka ri India.
Ia ki bniat Hati la pynhap hapoh jong ka aiñ Wildlife Protection Act (WLPA), 1972 bad la kem hapoh ka kyndon 50 jong ka WLPA, 1972. Ia ki bniat hati la aiti noh sha ka tnat Wildlife.
Ka Ophis Custom ka la ai khublei ia ki Pulit jng ka Biswanath Police Station bad ia ka tnad khlaw kiba la synran lang ban ioh kurup ia ki bniat Hati.
Katkum ka Wildlife Protection Act (ba la pynbeit thymma) naduh ka 1 tarik, Iaiong, 2023 la ai bor shuh shuh ia ka ophis Custom ban iakhun pyrshah ia ka jingiakhaii tuh ia ki mrad khlaw hapoh ka Ri India. Halor kane bor ba la pynkup ka ophis Customs ka la kham ioh lad ban iakhun pyrshah ia kane ka jingiakhaii beain ia ki mrad khlaw.
Mynta hapoh shisnem ka ophis Customs (Preventive), HQ, Shillong ki la ioh ban kurup ia ki Kerbei kiba la kot haduh 68.87 kilo bad 11.536 kilo jong Ambergris Whale Vomit bad kurup ruh 360 gram bniat Hati bad ka khlieh jong u sim Kohkarang, ka sim Flame, khun shrieh Orangutan. Ia kine ki mrad la iada hapoh ka Wildlife Protection Act, 1972, kaba trei kam ha Meghalaya, Mizoram bad Assam.
Ka ophis Custome ka la kut jingmut ban ia khun pyrshah ia ka jingkhaii beain ia ki mrad khlaw ha khappud bad kiwei ki kam sniew bad kin iatreilang ruh bad kiwei ki kynhun kiba iada na kane ka jingkhaii beain ia ki mrad khlaw.
