Shillong, Jymmang 31: Ka jingther jong u lapbah lapsan na ka jingwan lynshop jong ka eriong Remal ha East Jaiñtia Hills District ka la pynshlei um ia ka surokbah National Highway-6 bad pyndkut ruh ia ka surok ha ka shnong Lumshnong..
Ka jingbteng jong u slap ban ther ha ka East Jaiñtia Hills District ka la pynjulor ia ka surok kaba hap hapoh ka Elak Nongkhlieh.
Katkum ka jingtip ba la iohlum na ki nongshong shnong kiba lang ryngkat bad ki video, la sakhi ba ka eriong Remal ka la pynpra ia ka surok ha ka shnong Shnongrim bad pyntwa ia ka khyndew hapdeng surok ha ka shnong Tongseng.
Da ki spah tylli ki kali ki la sahkut na kane ka jingtwa khyndew hapdeng ka surok bad ka jingpra jong ka surok kaba la buh jingma ia ka leit ka wan jong ki paidbah.
Ki nongtrei jong ka tnat PWD (R) ki la leit mar mar ban pynkhuid ia ka khyndew bad na ka liang jong ka tnat PWD (R) ka dang wad ia ki lad ki lynti ban kumno ban shna pynbha shipor ia ka surok kaba la pra ha ka shnong Shnongrim khnang ban pyllait ia ki kali kiba sahkut hapdeng surok.
