Khliehriat, Jymmang 03: Ki Pulit ka East Jaiñtia Hills District kiba pynlong ïa ka jingtalasi bad khynra ïa ki kali ha Ratacherra Out Post ha surokbah NH-6 ha ka step sngi Baar ki la ioh ban kurup ïa u drok uba shongdor T. 1.1 klur na kawei ka kali kaba don ïa u nombar ML05 X 7741.
Ki Pulit ki la iathuh ba ha ka jingtalasi bad jingkhynra na ka la lap ïa ki song kiba la suba jur ba la thep ia u drok bad ha ka jingtalasi la lap ia u drok Heroin uba khia 136 grams. Ka dor ïew jong une u drok ka la poi T. 1.1 klur.
Ki Pulit ki la kem noh ïa ki lai ngut ki briew kiba la donkti ban rah ïa u drok kiba la tip kyrteng kum u Tazirul Sheik, na ka shnong 20 Fersakandi, West Garo Hills uba dei ruh u nongñiah jong ka kali, u Binod Baro na Ukhura, Kamrup District, Assam bad u Abdul Mukit na Shiberchak, Badarpur, Karimganj District, Assam.
Ki Pulit ki la kurup ïa ka kali bad lai tylli ki Mobile Phone.
