Shillong, Jymmang, 02: U Rangbah Kur jong ka Kur Mawlong Bah Harison Mawlong u la pynshai ba ka Kur Mawlong Mawmih & Krang Mawkhar ka la ïoh jingtip ba don ka don ka jingïajied nongkitkam sopsop khlem ka jingtip ki Rangbah Kur ne ka Kur baroh kawei kumba la paw ha ki lad pathai khubor ha ka 20 tarik, Rymphang, 2024 ba ka Kur ka la jied ïa ki nongkitkam ba thymmai ha ka 10 tarik Rymphang, 2024.
“U Rangbah Kur Bah Harison Mawlong uba la long u Rangbah Kur la kumba 40 snem tam bad dei satang ma nga marwei ba dei u Kñi, baroh ki la khlad lut. Ka kur ka pynpaw ba ka khubor ka long kaba bakla bad pynthohbria ïa ka Kur Mawlong Mawmih & Krang Mawkhar,” ong u Bah Harison ha u kyrwoh.
U la pyntip ba ka Kur Mawlong Mawmih & Krang Mawkhar ha ka 28 tarik Jymmang 2017 ka la pynlong ïa ka jingïalang ba la pynïaid da u Rangbah Kur (L) Ephrain Mawlong ha kaba la shim ïa ka rai naduh ka 28/05/2017 shakhmat ba ki nongkitkam jong ka Kur yn jed noh da ka jinghiar pateng katba dang don ki Kñi kin long beit ki Kñi ki nongpynïaid kur baroh kum ka riti pynïaid u Khasi hyndai bad kan sa hiar hà ki Pyrsa bad kumta terter sa ki pyrsa ksiew, pyrsa miaw. Kum ka Kur Mawlong Mawmih & Krang Mawkhar kane ka sngi la weng noh ïa ka jinglong Secretary Kur Mawlong Mawmih & Krang Mawkhar barim u Bah Rangshanbor Mawlong namarba u dang dei tang u pyrsa ksiew hakhmat ki Kñi kiba bun bad ka Mawlong Mawmih/Krang ka la jied thymmai noh ïa u Bah Johhny Mawlong uba dei u pyrsa trai jong u (Late) E.K Mawlong bad la pynskhem ïa u da ka Dorbar Kur paidbah kaba la long ha Mawmih ha ka 19/09/2019. La nang pynskhem shuh shuh ïa ki nongkitkam jong ka Kur da kaba rejistar hapoh ka DC Office, Shillong ha u snem 2023 naduh u Rangbah Kur, Secretary Kur bad ki Executive Members.
Ha kane kajuh ka jingïakynduh lang jong ki para Kur Mawlong Mawmih & Krang Mawkhar ki pynpaw ka jingsngewkhia kaba jur ïa ka jingleh jubor jong u Secretary kur barim Bah Rangshanbor Mawlong ban leh ki kam khlem ka jingtip ka kur bad ban ym burom ïa ka jing pynkheiñ Secretary Kur jong u da ka rai u paidbah Kur Mawlong Mawmih & Krang Mawkhar. Kumta halor kane ka jingleh jong une uba kam Secretary kur ka pynlyngngoh ba kumno u nud ban khot ïa ka Dorbar Kur sopsop khlem ka jingtip jong ka Dorbar Kur Mawlong Mawmih & Krang Mawkhar bad khlem ka jingdon lang jong u Rangbah kur u Bah Harison Mawlong uba long sa tang ma u Kñi Rangbah uba dang don haduh mynta.
Ka Kur Mawlong Mawmih & Krang Mawkhar ka pynrem jur ïa kum une u ba kam Secretary u dang dei tang u kyrdan pyrsa ksiew u lah ban ïaid lait ïa ka dorbar kur, ka kur ka dap da ka jingpyrshah ba khraw bad pynrem ba kumno u briew u bym don jingithuh da ka Kur Mawlong Mawmih & Krang Mawkhar , u nud ban leh donbor bad ban khot ïa ka dorbar kur khlem ka jingtip lang jong u kñi Rangbah.
Ka Kur Mawlong Mawmih & Krang Mawkhar ka maham ba ym dei ban pynkulmar ïa ka kam Kur Mawlong Mawmih & Krang Mawkhar ka don hapdeng ka suk ka saiñ bad ka maham ba ym dei mano mano ban mushlia lane pynsniew ïa ka kam Kur Mawlong Mawmih & Krang Mawkhar.
Ka Kur ka pynpaw ba katkum ki kyndon treikam jong ka Kur Mawlong Mawmih & Krang Mawkhar, ïa ka kam nongïalam kur ki dei ban bat beit ki kñi ym dei da ki pyrsa ksiew, lada ki kñi kim don shuh kan sa hiar ha ki pyrsa nangta ter ter sa ki pyrsa ksiew pyrsa miaw. Kane ka jingleh jong une u pyrsa ksiew ka pawshai ba um burom shuh ïa ki kñi bad u la pynkheiñ ïa ki kyndon treikam jong ka kur, la ong shuh shuh u Rangbah Kur Bah Harison Mawlong.
