Shillong, Jymmang, 03: Arngut ki briew kiba la shah kynnoh ba ki dei kiba ki donkti ha kaba thmu ban leh be-ijot ïa kawei ka samla kynthei kaba la don kumba 17 ne 18 snem ka rta ha kawei ka shnong kaba don ha ka thaiñ Nongthliew, kaba hap hapoh ka Eastern West Khasi Hills District, ha ka sngi Thohdieng ki la shah bom shnong haduh ban da jem jai ha ki paidbah nongshong shnong.
Kane la jia ha ka por kumba 12:00 baje mynsngi bad u Sordar Shnong u la ioh jingtip ha ka por kumba 1:30 baje noh sngi.
U Sordar Shnong ha ka jingïakren bad ki nonglum khubor u la ong, “kine ki arngut ki la ktah kti ïa ka samla kynthei bad ka don ruh ka dak na ryndang (jong ka kynthei) ïa kaba ki thmu leh be-ijot ne ki thmu pynïap ïa kata ngim tip. Ki la don ki paidbah kiba la ïoh ïa kane bad ki la beh bad iohbat (ïa kine ki arngut). Ki paidbah ki la pyntip sha nga kum u Sordar Shnong.”
U la ïathuh ba ha kaba nyngkong, la rah ïa kine ki arngut ha ka ing jong ka samla bad phla ruh ba ki arngut ki shynrang ki la thmu ban leh be-ijot ïa ka da kaba pynap da ka tari.
“Kum u Sordar Shnong uba don jingkitkhlieh, ngi la ïalam noh ïa kine ki arngut sha Dorbar Hall jong ka shnong khnang ba ngin pyllait ïa ki na kano kano ka jingjia kaba sniew ïa kine ki arngut,” la ïathuh u Sordar.
U la ïathuh ba ki paidbah na ki shnong kiba marjan tang shu ioh jingtip halor kane ka jingjia ki la wan poi hapoh ka shnong. “Ki riew rangbah jong ka shnong ki la pyrshang katba lah ban ïada ïa kine ki arngut ban ym jia kaei kaei kaba sniew ïa ki bad ngi la pyntip ruh sha ki bor jong ka aiñ (Pulit). Ki Pulit ki la wan poi hapoh shnong hynrei ki paidbhur ki la thombor bad kim shah satia ïa ki Pulit ban tur shajan,” la ïathuh shuh shuh u Sordar Shnong.
U la ïathuh, katba u dang ïakren bad ki Pulit, ki paidbhur ki la nang wan tur ban ym ailad satia ban pyllait im ïa ki arngut.
“Katba ngi dang ïakren (bad ki Pulit) namar ka jingbun shaba palat ki paidbhur ngim shym la lah ban tehlakam. Ki paidbhur ki la pynpait wat ïa ka jingkhang nar (jong ka Community Hall). Dei haba ki paidbhur ki la ioh rung shapoh ka Dorbar Hall ngim shym la lah shuh ban tehlakam ïa kane ka jingjia,” ïathuh u Sordar.
U la ong ruh ba kum ka shnong ka la pyntip ba ka tnat Pulit kan phah kham bun ki bor Pulit hynrei namar ka jingduna jong ki Pulit ki paidbhur ki la bom la shoh hakhmat jong ki Pulit (ïa ki arngut).
Haba kylli, u la ïathuh ba kine ki arngut hadien ba ladep bamja sngi ki la mih na ka jaka trei bylla bad ym tip satia shaei ki leit. U don ruh uwei u rangbah uba trei bylla lang bad uba sakhi ïa ka jingjah jong kine ki arngut na jaka trei hynrei tad haduh ban da poi ha u pud ba kin da shah bom shnong, la bynrap u Sordar Shnong.
Hadien kane ka jingjia, ki Pulit ki la pynkit noh ïa kine ki arngut kiba la mynsaw jur sha Tirot Sing Memorial Civil Hospital, Mairang.
Uwei napdeng kine ki arngut u la khladnoh ynda poi ha Civil Hospital, Mairang, katba ïa uwei pat uba dang lait im la pynkynriah noh sha Shillong Civil Hospital ban ioh jingsumar.
La ioh jingtip ba uba khladnoh u dei u rangbah uba la don 36 snem ka rta bad u don 6 ngut ki khun.
Ki bahaiñg hasem ki la ïathuh ba ki paidbhur kim shym la ailad satia ban ïakren pynbeit hadien ba la rah ïa ki arngut sha Dorbar Hall bad nalor kata ki paidbhur ki la tangon ïa ki arngut hakhmat jong ki.
